SDG India Index tihchhuahah hmarchhak state-ten hma an sawn

Sustainable development Goals (SDG) India Index chu a ṭum li nan NITI Aayog chuan a ti chhuak leh a, he Index chhuah tharah hian hmarchhak state Assam, Arunachal Pradesh leh Manipur te chu 'Front Runner' Category-ah an awm thar.

SDG India Index hi State leh UT-te hmasawn dan teh nana hman niin, SDG thil tum zinga 16 tihhlawhtlin nana ṭangkai tur tehfung 113 hmangin State leh UT te hmasawnna chu teh ṭhin a ni. Index hnuhnung ber kha kum 2020-21 a tihchhuah niin 2023-24 Index ah hian kawng tam takin India chuan SDG tihhlawhtlin kawngah hma a sawn a tih theih. Index tharah hian State leh UT 32 chu 'Front Runner' category-ah awm tharin kum 2020-21 Index nena tehkhinin 10 in a tam zawk a ni. Front runner la thleng pha lo state pali an la awm a, heng zingah hian hmarchhak state pahnih an tel.

Hmarchhak state zingah Assam chu a ti ṭha ber niin, 2020-21 Index aṭanga tehin a pumpuia an score hmuh belh zat chu 8 points a ni a, hei hi rampum huap pawhin point punna sang ber a ni. Assam hi Index tihchhuah a nih tirh aṭanga an point khawl zat 65 leh 99 inkar a nih ve tak avangin 'Front Runner' category-ah an awm ve ta a ni. Manipur pawh Index hnuhnung ber aṭanga tehin an hmuh belh zat point 8 niin Front Runner category-ah an lut pha ve ta bawk. Index hnuhnung ber aṭanga tehin Tripura chuan 6 point an hmuh belh a, Arunachal leh Sikkim in point 5 ve ve, Mizoram point 4, Meghalaya point 3 leh Nagaland point 2 te an ni. Hmarchhak state zingah Nagaland leh Meghalaya chu 'Front Runner' category-ah la tel pha ve loin 'Performer' category-ah an la awm a ni.

India rampum huapin Kerala leh Utatarakhand chuan point 79 hmuin a chung berah an awm a, Tamil Nadu chuan a dawt a ni. 2023-24 Index hian SDG tihhlawhtlin a nih theih nan India chuan a ṭha lamin hma a sawn zel tih a tarlang a, India SDG overall score chu 71 -ah chhoin hei hi kum 2020-21 Index a 66 point aiin a sang zawk a ni.