Manipur chungchangah sorkar leh PM hi engtik nge an harh chhuah dawn : Priyanka Gandhi

Jiribam district, Manipur-a Central Reserve Police Force (CRPF) mi pakhat kah hlum a ni chu Congress hruaitu, Priyanka Gandhi Vadra chuan sorkar laipui beih nana hmangin Manipur chu a keh sawm ṭep tawh tih a sawi. "Engtik nge sorkar laipui leh Prime Minister hi an muhil an harh chhuah ang?" tiin zawhna a siam.

Priyanka chuan sipai martar chanchin a hriat chuan a tilungngai hle tih sawiin, a chhungte a tawrhpui takzet tih a tarlang bawk. Manipur buaina chungchang sawi langin Gandhi chuan nikum May 3-a buaina inṭan chu tun thlengin a la reh lo a, state chu a keh darh ṭep tawh a ni, a ti. Sorkar laipui leh PM Modi te chu Manipur an muthilh sanna lak ata harh chhuak tawh se tih chu Priyanka chuan a duh hle a ni.

CRPF jawan, Ajay Kumar Jha (kum- 43) chu Mongbung khuaah helpawl ni ngeia rinte chuan Pathianni zing khan an kap hlum a ni. Jha hi a luah kah fuh niin damdawi-in thlenpui a nih hnuah a thi tih hi puanzar a ni. CRPF mi bakah hian Manipur police mi leh sa pakhat chu kah fuh ni bawkin damdawi-inah enkawl mek a ni a, a dinhmun a ṭha ni a tarlan a ni thung. Manipur police leh CRPF te hian Jiribam-ah venhimna an tikhauh nghal a, buaina dang a chhuah loh nan venhimna an uluk hle a ni.

Kuki Inpi Manipur (KIM) chuan Sejang leh Mongbung khuaa helpawl (sorkarin a ruka a thlawp) ten an beihna chu an dem takzet tih sawiin, sorkar laipui chu hnam tlem zawkte dikna chanvo humhimsak turin an ngen. KIM hian CRPF chu ṭan lam nei ṭhin an ni tiin, central armed force-te chu Kuki-Zo awmna lai aṭang hnuhdawh ni se an duh tih an tarlang. Meitei police-te pawh heng hmun aṭanga lakkir ni se an duh a, Kuki-Zo leh Meitei inrina laiah hnam pahnih inkara thulaila taka rorel thei turte dah ni zawk se an duh tih an tarlang tel bawk.