Tripura : Dhalai district-ah dawr leh in tam tak tihchhiat a ni

Tripura-a rawlthar rual hnih inkara intihbuaina thleng avangin tribal pakhat chuan a thih phah a, hemi avang hian Dhalai district-ah dawr leh chenna in tam tak tihchhiat leh hal an ni tawh tih district thuneitute chuan an tarlang.

Gandatwisa, Dhalai district-ah July 7 khan rawlthar rual hnih inkarah intihbuaina a thleng a, tribal zirlai kum 19 mi chuan hliam na tak tuarin kar liamta Zirtawpni khan GBP Hospital-ah a boral a ni. Hemi hnu hian Dhalai district, a bikin Ganda Twisa sub-division ah pawikhawihna a thleng zui a, dawr 30 aṭanga 40 leh chenna in 20 aṭanga 25 vel bawr chu tihchhiat emaw hal emaw a ni tih tarlan a ni.

Dhalai district magistrate Saju Vaheed A leh superintendent of police Avinash Rai te chuan khawtlang mipuite inhmuhkhawmna neihpuiin, an inkara inrintawnna a awm leh thuai theih nan ṭan an la. District thuneitute hian ni hnih chhung dawr an khar tawh sumdawngte chu an dawr hawng leh tawh turin an ngen. Sumdawngte hian venhimna khauh lehzuala kalpui an ngiat tih thuneitute hnenah hian an thlen ve bawk. Saju Vaheed chuan dawr tihchhiatsakte chuan zangnadawmna an dawng dawn tih tarlangin buaina vanga hmunhim lama sawn chhuahte pawh an in lama hruai haw leh thuai an ni dawn tih a sawi.

TIPRA Motha dintu, Pradyot Kishore Debbarman chuan Dhalai district-a remna siam turin mipuite chu a ngen a, police officer nen an inbiak thu sawiin pawikhawihtute chu man chhuak ngei turin a chah tih a sawi. Police lam hian tun dinhmunah boruak la ṭang mah se buaina chhuak chu an khuahkhirh thei niin an sawi.