Hmarchhak biala Republic Day lawm thlirletna :

Mipuite'n mawhphurhna an lak a ngai : Arunachal Governor

Arunachal Pradesh Governor Nirbhay Sharma chuan hma lam pana state kal zelna turah mipuite'n sorkar an thawhpui a pawimawh thu sawiin, mipuite'n an koah mawhphurhna an lak a ngai a ni, a ti.

"Kan suangtuahnate hriain kan thil tum tipuitling turin thawkchhuak ang u. Hmasawnna chu sorkar kalphung ṭha neihna hmanrua ni rawh se," tiin Thawhṭanni khan Republic Day thuchah a sawi.

Governor Sharma chuan mipuite hmasawnna atana hna thawktu, sorkar rintlak leh langtlang sorkar awm se la, democracy kalphung chu mipuite rorelna a nih angin mi zawng zawngin ram siamṭhat kawngah tha an thawh a ngai a ni, a ti a, mimal thil tum piah lamah ram leh mipuite hmasawn nan thawk chhuak turin kalkhawm mipuite a ngen.

Sorkar chuan infrastructure, education, health leh skill development te a ngaipawimawh a, hemi rual hian hydropower, tourism, agriculture leh horticulture lama Arunachal-in theihna a neihte ṭangkai zawka hmang tur leh leilung hausakna te haichhuak turin a bei mek a ni, a ti.

Governor chuan puitlingte chu ṭhalaite hruaitu tura ngenin, ṭhalaite'n ram hmasawnna atana an theihna leh chaknate an hman ṭangkai theih nan a nun vawn uluk kawngah mawhphurhna laksak turin a ngen bawk.

CM Ibobi-a'n tharum thawhna bansan turin helpawlte a ngen

Manipur-a Republic Day lawmna lian ber, Imphal-ah Thawhṭanni khan Chief Minister Ibobi Singh chuan thuchah sawiin, hel pawlte chu tharum thawhna bansan turin a ngen.

Manipur-a Republic Day lawmna hi hel pawl hrang hrangte'n boycott mahse venhimna khauh tak hnuaiah neih a ni.

Imphal, Kangla Fort hmuna a lawmna neih ṭan hmain, a bul hnai hmun li-ah bomb a puak a, thi leh hliam erawh an awm lo. Bomb hi zing dar 7 aṭanga tlai lam dar khat inkarah a puak hlawm a, Republic Day lawmna bul hnai- Polem Leikai, Yaiskul, New Chekkon leh Hatta-ahte a puak a ni.

Chief Minister Ibobi chuan tharum thawhnain an state tan thil ṭha engmah a thlen loh tur thu sawiin, mipuite tana harsatna thlentu mai a ni, a ti.

Republic Day leh Independence Day lawmna hi Manipur helpawl- United National Liberation Front, Revolutionary Peoples Front, Kanglei Yawol leh pawl dangte chuan kumtin an boycott ṭhin a, Thawhṭannia Repblic Day lawmna pawh an boycott leh avangin Imphal, Kanna Lup-a sumdawnna hmun te chu khar a ni a, Manipur leh state danga khualzin phur lirthei service te pawh chawlhtir an ni bawk.

Tripura a ralmuang tawh : CM Manik Sarkar

Tripura-a Republic Day lawmna chu helpawl hrang hrang te'n boycott mahse muanawm taka hman a ni.

Agartala, Assam Rifles parade ground-a lawmnaah Chief Minister Manik Sarkar chuan hnam puanzar pawtpharhin, Republic Day thuchah a sawi.

Chief Minister Sarkar chuan helpawl ṭhenkhatin ramri chhehvela hmasawnna project te tihbuai tum ṭhin mah se Tripura chu a ralmuang tawh a ni, a ti.

Sarkar chuan sorkar laipuia BJP sorkar chu sawiselin, BJP mi leh sa te chuan sorkar laipui ṭanpuinain India rama sakhaw hrang hrang zalenna tihbawrhban an tum ṭhin a ni, a ti.

Left Front sorkar chuan Tripura state ṭhendarh chu a phal loh thu leh ṭhendarh tuma hmalakna chu theihtawp chhuaha an dodal tur thu a sawi bawk.

"Remna leh muanna tihbuai tumin pawl ṭhenkhat chuan state ṭhendarh tumin hma an la a, Left Front sorkar chuan theihtawp chhuahin a dodal zel ang," a ti.

Tripura Chief Minister chuan helpawl ṭhenkhat chu himna zawngin Bangladesh-ah an la awm thu sawiin, security force te'n theihtawp chhuah mahse helte chu beih chhunzawm zel an la ngai a ni, a ti.

Tripura Tribal Areas Autonomous District Council (TTAADC) aṭangin Indigenous People's Front of Tripura (IPFT) chuan state hran siam an phut a ni.

Sarkar chuan kum 40-a upa state chhung­a helna chu state sorkarin a nuaibo ṭep tawh a, mahse pawl ṭhenkhat chuan mimal hlawkna an um luat avangin helna tharthawh leh an tum a ni, a ti.

Mau râp-in awm lohnaah Sikkim siam tum

Sikkim-a Republic Day lawmna lian ber, Gangtok, Paljor Stadium-a neihah Thawhṭanni khan Governor Shriniwas Patil chuan thuchah sawiin, kum 2015-ah Sikkim chu mau râp-in (kutcha house) awm lohna leh organic state-a an puan hman a beisei thu a sawi.

Governor Patil chuan education, health & welfare, rural development, forest leh tourism-a Sikkim hmasawnna hrang hrang tarlangin, Sikkim chu India rama state ṭhang chak berte zing a mi a ni, a ti.

Sikkim luhna kawngpui, National Highway 10 chungchang chu a ngaihpawimawh thu sawiin Governor Patil chuan state sorkarin Border Roads Organisation (BRO) enkawl chhunzawm tir rih tur emaw National Highway Authority of India kuta hlan turin Union Ministry of Road, Transport and Highways hnenah a ngen thu a sawi.

Sikkim Governor chuan Pakyong Greenfield Airport chu peihfel thuai a pawimawh thu a sawi bawk a, airport thar chuan Sikkim tourism chu dinhmun sang taka a hlankai a beisei thu a sawi bawk.

Patil chuan Sikkim-a hydro power project kalpui mekte chu state sum hnar lian tham a la nih tur thu a sawi.

Organic state-a Sikkim puan a nih theihna atana state sorkar hmalakna a tarlang bawk a, organic farming tihchangtlunnna atana sorkar laipuiin hmarchhak bial tana cheng vaibelchhe 100 a ruahman aṭangin state sorkarin ṭanpuina a dil thu a sawi bawk.

M'laya-in R-Day-ah 'Destination Meghalaya' a tlangzarh

Meghalaya sorkar chuan kum sarih chhunga education, health care, hospitality leh leilung hausakna lama investment tihlenna atana ruahmanna a buatsaih, 'Destination Meghalaya' a tlangzarh.

Shillong, Polo ground-a Republic Day lawmnaah Deputy Chief Minister R C Laloo chuan thuchah sawiin, 'Destination Meghalaya' chu kalpui ṭan a nih thu a sawi a, human resources lama hmasawn nan investment tihlen a pawimawh thu a sawi.

Meghalaya Chief Minister Mukul Sangma chuan Republic Day hi Garo Hills hmunpui, Tura-ah a hmang.

Deputy CM Laloo chuan mi ṭhenkhat kal sualte chuan an thil tum bawhzui nan tharum an hman thu a sawi a, heng mite hian mipui­te aiawha ding niin inngai mahse harsatna siamsaktu zawk an ni, a ti.

ANVC leh ANVC-B helpawlte nen inremna tluantling an siam ta chu lawmawm a tih thu sawiin Laloo chuan hel pawl dangte pawh tharum thawhna bansan turin a ngen.

Meghalaya-Assam ramri buaina chung­changah Deputy Chief Minister chuan ramri chheh­vela mipuite hmasawn nan "Inter-State Border Area Development Programme" duan a ni, a ti.

State chhunga phalna nei loa pemlutte khuahkhirh nan ruahmanna mumal tak siam thuai an tum thu a sawi bawk a, an thil tum tihpuitlin nan department hrang hrangte an inbuatsaih mek a ni, a ti.

Meghalaya Deputy CM chuan tourism tihchangtlunna chu state sorkar thil ngaihpawimawh berte zing a mi a ni, a ti a, khualzin mi tam zawk hip nan cultural programme hrang hrang buatsaih zel an tum thu a sawi bawk.

Khawtlang hmasawnna atan remna leh muanna a ngai: Nagaland Gov

Nagaland Governor P.B.Acharya chuan Nagaland-a Republic Day lawmna lian ber, Civil Secretariat kawtah hmanah Thawhṭanni khan thuchah sawiin, khawtlang hmasawnna atan remna leh muanna neih a ngai, a ti.

Governor Acharya chuan Naga political issue chinfel nan state sorkar leh sorkar laipuiin theihtawp an chhuah mek a ti a, remna tluantlin a awm theih nan sorkar chuan a bei chhunzawm zel ang, a ti.

Nagaland-a dan leh thupek dinhmun tarlangin Acharya chuan Assam ramria buaina chhuak ṭhin pawhin zia awm lam a pan thu a sawi a, buaina a chhuah chhunzawm zel loh nan district thuneitute leh police te'n Assam thuneitute nen inbiakna an neih ṭhin a pawimawh thu leh a hun taka thuneitute inrawlh a pawimawh thu a sawi.

Governor Acharya chuan Nagaland mipui­te chu agriculture-ah an innghah thu sawiin, Nagaland-ah pawh organic farming tihchang­tlun tuma hmalak a nih tur thu a sawi bawk.

Nagaland Governor chuan state-in sum leh paiah harsatna a tawh thu sawiin, 14th Finance Commission-in sorkar laipuia report a thehluh chuan Nagaland tan thil lawmawm a thlen ngei a beisei thu a sawi bawk.