KHADC CEM ngaihdam dilna Justice SR Sen-a'n pawm lo

Meghalaya High Court-in court rorel zah­lohna thubuai a siamsak Khasi Hills Autonomous District Council (KHADC) CEM Adelbert Nongrum-a thubuai chu Thawhlehni khan ngaihtuah a ni a, Justice SR Sen chuan Nongrum-a ngaihdam dilna a pawmsak lo.

High Court-in Me­gha­laya-a Rangbah Shnong (Headmen) te thu­neihna a tihtawpsak chungchangah Nongrum-a'n court rorel a sawiselna chu tualchhung chanchinbuah a chhuak a, HC chuan tualchhung chanchinbua thu chhuak behchhanin, Contempt of Court Act, 1971 hnuaiah thubuai a siamsak a ni.

Nongrum chuan, "Kan khawtlang inrelbawlna kalphung ka hmangaih luatah court huatthu ka lo sawi palh a ni," tiin court hmaah Thawhlehni khan a sawi a, Justice Sen chuan chhangletin, "Kei pawh Meghalaya-a piang leh seilian ka ni a, kan naupan laiin Rangbah Shnong te'n no objection certificate (NOC) an pechhuak ngai lo, mahse tunah chuan bank account hawn dawn te, tui leh electric connection tih dawn te'n Rangbah Shnong te hnen aṭangin NOC lak a ngai tawh a ni," a ti.

Justice Sen chuan Rangbah Shnong te hian India danpui kalh zawngin thuneihna an nei thiang lo, a ti a, dan hmanga rorelna chu sorkar rorelna a nih loh thu leh judge te chuan rorelna dik hlenchhuah turin tumah ṭan lam an neih loh thu a sawi.

Justice Sen chuan an thubuai ngaihtuah chu High Court division bench hmaa insawifiahna a nih avangin Division Bench-ah a thlen leh tur thu a sawi.