Assam police te'n NDFB(S) hel panga an man

Assam police te chuan security force te nena Assam, Sonitpur leh Udalguri district-a hel dapchhuah beihpui an thlaknaah tun hnai khan Songbijit-a kaihhruai, National Democratic Front of Bodoland (NDFB-S) hel panga an man thu an tarlang.

Bodoland Territorial Area District (BTAD) IGP L R Bishnoi chuan NDFB(S) hel pahnih chu Udalguri district, Kusrabari khuaah police te'n an man thu a sawi. Hel an mante hi Section Commander Sanjay Basumatary leh Dhananjay Basumatary an ni.

Police te chuan an hnen aṭangin pistol pahnih, vawmpuah bomb pathum, ignitor set leh silai mu pali an man tel thu Bishnoi chuan a sawi.

Sonitpur district SP Manavendra Devroy chuan police leh security force ṭangrualin Sarakpur Dhuli Nalah khuaah NDFB-S hel pathum an man thu a sawi bawk. Hel an mante hi Nitul Daimary, Runilush Daimary leh Sukson Basumatary te an ni a, an hnen aṭangin AK 47 silai pakhat, Chinese siam silai pakhat leh vawmpuah bomb pakhat an man tel bawk.

Nitul Daimary NDFB-S Third battalion-a deputy commander nia inchhal a ni a, nikum January 28-a Sonitpur district, Additional Superintendent of police Gulzar Husain thahnaa mawhphurhtu nia puh a ni.

Hetihlai hian Bengaluru police te chuan Thawhlehni khan NDFB-S organising secretary, kum 27 mi Sanju Bordoloi an man thu an tarlang.

Bordoloi hi kar khat chhunga Bengaluru-a NDFB-S hel an man pahnihna a ni a, January 23 khan police te chuan NDFB-S hel Birkhang Basumatary an lo man tawh bawk.

Bengaluru Deputy Commissioner of Police Abhishek Goel chuan NDFB-S hel an man thu hi sawiin, Bordoloi chu National Investigation Agency (NIA) leh Assam police te kuta hlan thuai an tum thu a sawi a, Basumatary erawh Assam police kuta an pek tawh thu a sawi.

NDFB-S hel te hi nikum December 23-a Sonitpur leh Udalguri district-a mi 80 chuang tualthihnaah mawhphurhtua puh an ni a, an thubuai hi NIA-in a buaipui mek a ni.