Hmarchhak mite buh zu damdawi atan a ṭha

Jorhat, Assam Agricultural University (AAU) hnuai College of Home Science (CHS)-a Department of Food and Nutrition mithiamte chuan hmarchhak mite buh zu (rice beer) siam chu damdawi chi hrang hrang atana a ṭhat thu an tarlang.

CHS chuan Tamil Nadu-a, Indian Institute of Crop Processing Technology (IICPT) nen ṭangruala buh zu an zirchiannaah buh zu-ah hian antioxidant activity an hmuchhuak a ni.

CHS department of food and nutrition-a mithiamte hi Deep Jyoti Bhuyan, Mridula Saikia Barooah leh Sudipta Sankar Bora te an ni a, buh zu zirchiannaah hian IICPT mithiam, K Singaravadivel pawh a tel.

Buh zu sample-a antioxidant activity hi phenolic acids, polyphenols leh flavonoids te'n an siam a, heng thil te hi natna hrang hrang, zun thlum, arthritis, lung natna, cancer leh Alzheimer natna thlentu doletna atan a hman theih thu research paper chuan a tarlang.

Research paper chuan buh zu hi Assam-a Karbi hnam peng ṭhenkhatin khawṭhalo leh hrawk na damdawi atana an hman thu a tarlang bawk.

Mithiamte chuan Japan mite buh zu siam pawh khawvel puma thehlar theih a nih chuan hmarchhak mite buh zu siam pawh khawvel puma phochhuah theih a ni, an ti a, hei vanga zirchianna nei an nih tih an tarlang bawk.

CHS mithiamte Mridula Saikia Barooah chuan an thil zirchian chu chhui zau zel an tum thu a sawi.

Hmarchhak bialah hian hnam hrang hrang 150 chuang an awm a, chung zing­ah chuan peng hrang hrang 200 chuang an awm leh a ni. Heng hnam peng hrang hrangte hian anmahni siamchhuah buh zu an nei ṭheuh a, buh zu chuan khawtlang nun­ah pawimawhna thuk tak a nei ṭheuh tiin thuchhuak chuan a tarlang bawk.