CAA hmanga khua leh tui nihna dil pariat chiah an la awm : Assam CM

Assam chief minister Himanta Biswa Sarma chuan thla li liam ta chhungin Assam-ah Citizenship Amendment Act (CAA) hmanga khua leh tui nihna dil mi pariat chiah an la awm tih a sawi. Dilna thehluttu zinga pahnih chiahin interview an hmachhawn a ni.

Chief Minister Sarma chuan Hindu Bengali chhungkuate chuan kum 1971 hmain India an luh hman thu leh India khua leh tui an ni tih an inhriatchian thu sawiin, chu chu court hmaa fiah pawh an ngam niin a sawi. Heng thu hi Hindu Bengali chhungkuate nen an inkawm changin CAA hmanga khua leh tui nihna an dil loh chungchanga a zawhna an chhan dan ṭhin a ni, a ti. CM Himanta chuan kum 2015 hnu lama lutte chu an ram lamah thawn kir leh vek an ni dawn tih a sawi bawk.

Assam sorkar hian kum 2015 hmaa India rama dan loa rawn lut, Muslim ni lote case chu foreign tribunal hnena thehlut tawh lo turin state border police-te hnenah a hriattir. Hetiang a nih avang hian tribunal chuan Muslim ni lo, a bikin Hindu Bengali-te chungchang chu a ngaihtuah hrih dawn lo a ni. Hemi chungchang hi Himanta chuan sawilangin, case ziah luhte chu an tihtawp ngawt theih a ni loa, case an ziah luh hmain CAA portal-ah khua leh tui nihna dil hmasa turin an ti mai zawk niin a sawi. Assam CM chuan kum 2015 hmaa lut, Muslim ni lote lakah thubuai chu ziahluh pawh ni se khua leh tui nihna nei thei an nih miau avangin awmzia a awm lo tih a sawi. Hetih rual hian tribunal a case kal mek chu tihtawp a ni dawn lo a ni, a ti.

Himanta chuan CAA hnuaia khua leh tui nihna diltu an tlem avangin he dan hian Assam a nghawng dawn lo tih a sawi a, CAA dodalna lantirtute chuan dan loa India ram rawn lut nuai 50 chuangin khua leh tui nihna an nei thei dawn tiin mipui hnenah hlauhthawnna tuh an tum tih a sawi bawk. Khua leh tui nihna chungchang hi Assam mipuite mar dek tak thil niin kum 2019-a CAA dodalna lantir a nih lai khan mi panga chuan an thih phah a ni.