Meghalaya : ILP ngiattuten check post siam belh

Meghalaya tan Inner Line Permit (ILP) system hman ve an duh a ni tih lantirna kawng khat atan leh state pawn aṭanga hnam dang rawn luh tumte dan nan ILP ngiattute chuan check post thar an siam leh. He check post thar hi Meghalaya chhak lam, East Jaintia hills district-a siam a ni.

Umkiang, East Jaintia hills district hi Assam depa awm niin ILP ngiattute chuan helai hmunah hian check post an siam a, an zinga pakhat chuan check post siam chhan chu hnam dang rawn luh tumte danna tur niin a sawi. Hnam dang rawn luh tumte lo danna tur siamtu zinga a tam zawk hi Khasi Students Union (KSU) mi leh sate an ni. Hetiang check post hi National Highway-6, Ri-Bhoi district leh Athiabari, West Khasi Hills district-ahte an lo siam tawh bawk.

KSU hian ILP hman bakah hian Meghalaya Residents Safety and Security Act (MRSSA) hman an ngiat. Hmun hrang hranga check post siam bakah hian Shillong khawpui chhungah hnam dang hnathawkte chu dan phalna thlapa Meghalaya chhunga awm an ni em tih an enfiah bawk. Hetiang an tih chhan hi kum rei lote chhunga state chhunga hnam dang rawn lut an tam tak vang a ni tiin, KSU chuan hnam dang dan nan mahni thuin hetiang hian hma an la ta mai tih an tarlang.