SC-in Nagaland sorkar puhna chhanglet turin sorkar laipui hriattir

Nagaland sorkar chuan December 2021-a Mon district-a civil mi 13 kah hlumnaa inhnamhnawihna nei nia hriat, sipai 30 te chhuichianna kalpui duh loah sorkar laipui chu puhin Supreme Court-ah writ petition a thehlut a, hemi chungchang sawifiah tur hian SC chuan sorkar laipui hnenah hriattirna a pe.

Chief Justice of India DY Chandrachud, justice JB Pardiwala leh justice Manoj Misra te awmna bench chuan he thubuai hi ngaihtuahin Ministry of Defence chu kar ruk chhunga chhanna pe turin a hriattir.

Nagaland Advocate General (AG), KN Balagopal chuan state police-ten sipaite an thiam lo a ni tih finfiahna ṭha tak tak nei mah se sorkar laipui chuan Armed Forces Special Powers Act (AFSPA) 1958 hnuaiah chhui theihna nei chungin sipaite hi a chhui duh lo a ni, a ti.

Nagaland sorkar hian December 4, 2021 a Oting khua, Mon district-a Indian Army-ten civil mi, helpawl emaw tia an kah chungchangah hian thudik hailan tumin ṭan a la a, Indian Penal Code hnuaiah thubuai tam tak ziah luh a ni. Supreme Court chuan kum 2022 July thla khan sipaite laka thubuai ziahluh hian AFSPA hnuaia chhuichiang tura pawmpuina a hmuh loh vangin a lo hnawl tawh a ni. Hemi hnu hian Nagaland assembly chuan hmarchhak pumah leh a bikin Nagaland-ah AFSPA dan hlih an duh tih chu lungrual takin a pawm a ni.