Arunachal : Pane Korong lui aṭangin bawlhhlawh kg 25,000 la chhuak

Arunachal Pradesh-a Pane Korong lui chu Youth Mission for Clean River (YMCR), Rengging Baane Yameng Kebang (RBYK) leh a bul hnai chengte chuan Inrinni khan tifaiin, bawlhhlawh kg 25,000 an chhar chhuak. Lui tihfaina hnatlanga thawk chhuak hi mi 150 vel an ni a, lui an tihfai chu thingphun hnatlangin a zui leh nghal a ni.

Pasighat MLA Tapi Darang pawh hnatlanga thawk chhuakin, lui tifai tura kal khawmte chu a fak a, ramngaw leh nungcha in bawlhhlawh vanga a tuar dan chu inzirtir a ngai hle a ni, a ti. MLA Darang chuan khawtlang thuneitute chu bawlhhlawh paih danah inkaihhruaina ṭha siam tur leh an lui tibawlhhlawh lo tura ṭan la turin a fuih.

RBYK aiawh, Dr. Kombong Darang chuan lui vawn fai chu an zavaia mawhphurhna a ni tih sawiin mimal tin bawlhhlawh titam lo zawnga nung turin a chah a, an luite chu an zavaia ta a nih angin an tu leh fate tan an humhalh a ngai tih a sawi bawk. Giidang Angong Society thupuangtu Tobom Dai chuan YMCR hmalakna chu fakin lui ti bawlhhlawhtute chu a chheh vela chengte an ni tih a sawi a, Pasighat fai zawk an neih theih nan bawlhhlawh a paihna hmuna an paih a ngai tih a sawi ve bawk.