Sorkarin hmarchhak bial inkalpawhna kawngpui ngaipawimawh: Gadkari

Union Minister for Road Transport, Highways and Shipping Nitin Gadkari chuan sorkar laipuiin hmarchhak bial inkalpawhna kawngpui a ngaihpawimawh thu sawiin, hmarchhak leh ramri biala kawngpui siamṭhat chu NDA sorkar thil ngaihpawimawh berte zing a mi a ni, a ti.

Delhi-a National Highways and Infrastructure Development Corporation Ltd (NHIDCL) logo tlangzarhnaah Union Minister Gadkari chuan Nilaini khan he thu hi a sawi a, India ramin infrastructure lama hma a sawn theihna atan corporation kalphunga an kalna chuan nasa taka hmasawnna a thlen a beisei thu a sawi.

"NHIDCL chuan inkalpawhna kawngpui hmasawnnaah nasa takin danglamna a thlen ka beisei a, hei bakah hian ṭhalai hna nei lote tan hnathawh tur a siamsak bawk dawn a ni," a ti.

Gadkari chuan inkalpawhna kawngpui zawng zawng chu ei leh bar dinhmun siamṭhatna kawngah an rintlak tur a ni, a ti a, a ministry chuan kawngpui sialna atana mimal ram laksak dan leh environment clearance chungchang a buaipui mek a ni, a ti.

NHIDCL hi Ministry of Road Transport and Highways kaihhruaia din a ni a, India ramin kawngpui ṭha a neih theihna atana thil ṭul- survey, design, kawngpui sial, a enkawl, national highway-a kawngpui hlankai bakah infrastructure dangte buaipui tura din a ni. NHIDCL hnuaiah hian hmarchhak bial kawngpui bakah ramria kawngpui sialte dah pawimawh an ni ang.

Gadkari chuan hmarchhak biala kawngpui chu a ṭhat chuan ṭhenawm ram te nena insumdawnna pawh lian zawka kalpui theih a nih tur thu leh India ramri venhimna a tihchangtlun tur thu a sawi.

NHIDCL chuan kawngpui kilometre 10,000 chuanga sei tihchangtlun a tum a, a thawh khatna atan Ministry of Road Transport and Highways chuan cheng vaibelchhe 34,300 senna tur, kilometre 3,586-a sei kawngpui sial hna thawh tur a pe ang.