M'laya Congress party hruaitute inhmuhthiamlohna vangin VP a bang

Meghalaya Congress party chhungah hruaitute inhmuhthiam lohna vangin MPCC vice-president KK Dkhar chu kum 26 chuang party member a nihna aṭangin Thawhlehni khan bang.

MPCC vice-president Dkhar hi MLA ṭum hnih thlantlin tawh a ni a, Congress sorkarah minister nihna pawh lo chelh tawh a ni.

Dkhar chuan party president DD Lapang hnenah banna a thehlut a, party hruaitute inhmuh­thiamlohna chu party a chhuahsan chhan a ni, tih a tarlang.

"Senior hruaitute inhmuh­thiamlohna chuan min tibuai tak zet a, ngun taka ka ngaihtuah hnuin Congress party-a primary member ka nihna leh MPCC vice president ka nihna aṭangin ka bang ta a ni," a ti.

"Kum 26 chhung Congress party member rinawm tak ka ni a, party hmathlir leh thil tumte chu ka chhuang tak zet a, mahse tun hnai aṭangin party hmel a danglam zo a, kan state-a kan party chu tun hma ang kha a ni tawh lo a ni," tiin banna lehkha a thehluhah a tarlang bawk.

Dkhar chuan state Congress party chu party policy leh hmathlir ngaipawimawh lotute kutah a awm tawh a ni, a ti a.

Meghalaya Minister hlui chuan Nilaini khan thuthar thehdarhtute zawhna chhangin, "Kum 2013 August thlaa insawifiah tura MPCC president min kohna ka dawng chu ka lawm lo hle a, state assembly inthlanah Pynursla constituency-a party candidate Prestone Tynsong tlin theihna tihbuai tumah puh ka ni," a ti.

Kum 2013 state assembly inthlanah hian Dkhar hian Pynursla constituency aṭangin party ticket a beisei a, mahse Central-a Congress hruaitute chuan Tynsong hi ticket an pe ta zawk a ni.

MPCC president hnen aṭanga insawifiah tura hriattirna a hmuh chungchangah Dkhar chuan insawifiahna chu a thehluh tawh thu a sawi a, mahse party hruaitute'n thutlukna an la siam loh tih a sawi.

Dkhar chuan politics-ah inhman chhunzawm zel a tum thu a sawi bawk.