Tripura CM-in sorkar laipui dodala nawrh huaihawt a duh

Tripura Chief Minister Manik Sarkar chuan central-a BJP kaihhruai NDA sorkarin public sector-a hna thar lak a khap vanga lungawi lohna lantir nan lungrual taka nawrh huaihawt a duh thu a sawi.

Nilaini khan North Tripura, Dharmanagar-a vantlang inkhawmah thu sawiin Sarkar chuan Union Finance Minister Arun Jaitley-a'n state sorkar zawng zawng chu October 31 thleng sorkar hna lak titawp turin a hriattir, a ti.

Tripura Chief Minister chuan central-a UPA sorkarin kum hnih kalta khan sorkar hna thar lak a khap thu a sawi a, chu khapna chu chhan mumal awm loin Modi-a sorkarin a chhunzawm thu a sawi.

"Sorkar laipuiin pension policy thar a siam leh sorkar hna thar lak a khap chu Tripura-a Left Front sorkar chuan a zawm ve lo a, kum thum kalta chhung khan department hrang hrangah hna thar 15,000 chuang kan la a ni," a ti.

Sarkar chuan NDA sorkar chu sawisel belhin Narendra Modi kaihhruai sorkar chuan thla riat thuneihna an chan hnuah pawh mipuite telna ram hmasawnna kalphung an ngaihtuah chhuak zo lo a, mahse sumdawng liante lawmna thlentu mai a ni, a ti.