Arunachal assembly-in kumina session hmasa ber a ṭan

Kumina Arunachal Pradesh assembly session hmasa ber chu Nilaini khan ṭan a ni a, Governor Lt Gen Nirbhay Sharma (Retd) chuan thuchah sawiin, Minister te chu state hmasawnna atan hmathlir thar leh inpekna thar nena bul ṭan turin a ngen.

Ni thum awh assembly ṭan ni hian Governor thu sawi zawhah MLA hlui thi ta pathum - Jarbom Gamlin, Setong Sena leh Sobeng Tayeng te sunna neih a ni.

Governor Sharma chuan MLA te chu state hmasawnna atana an hnathawhnaah tualchhung thil leh tribal hnam kalphung hrang hrangte inphuar tir lo turin a ngen a, state sorkar leh sorkar laipui project te ṭha taka kalpui a nih theih nan MLA te chu an bial chhungah an hun tam thei ber hmang turin a ngen.

"Sorkar kalphungah lang­tlang­a rorelna kalpui a nih theih nan leh a tam thei ang bera mipui­te an inrawlh theih nan theihtawp kan chhuah a ngai a ni," tiin Governor chuan a sawi bawk.

Chief Minister Nabam Tuki-a kaihhruai state sorkar hmalakna hrang hrang chu fakin Governor chuan, "Kan sorkar chuan Arunachal hmasawnna atan mawhphurhna lian tak, Arunachal Vision-2030 ruahmanna a siam a, hei hi kawng hrang hranga sorkar inrelbawlna tihchakna tur a ni, a ti. Kum 15 chhunga sorkar hma­thlir chu a puitlin nan theihtawp chhuahin state sorkarin a bei zel dawn a ni, a ti.

Prime Minister special economic package kaltlanga cheng vaibelchhe 33,000 hu infrastructure project chungchang sawiin Governor Sharma chuan Itanagar Water Supply leh Harmuti-Naharlagun Railway line te chu peihfel a nih tawh thu a sawi a, Trans-Arunachal Highway, Tezu Airport, Advanced Landing Grounds, 110 MW Pare Hydro Electric Project leh Civil Secretariat building project te chu chak taka kalpui mek zel a ni, a ti.