Assam-a school leh college-te Nov 2-ah hawng dawn

Assam education minister Himanta Biswa Sarma chuan an state-a school leh college-te chu November 2-ah hawn an ni tawh dawn tih a sawi. 

School hi Class 6-12 chin chauh hawn a ni dawn thung a, nursery - class 5 hawn hun tur erawh sorkarin thutlukna a la siam lo. 

Minister chuan private school leh coaching centre-te pawh November 2 aṭangin hawn phalsak an ni dawn a, mahse zirna in hrang hrangah hian hri darh tur venna atana Covid-19 dan siamte chu khauh taka kenkawh a ni tur a ni, a ti.  Zirna in hrang hrangte pawh health department lam nen inbe pawp tura tih an ni a, a ṭul dan azira test pawh neih ṭhin a ni ang. Sarma chuan private school-te chuan online class neih chhunzawm an duh zawk a nih pawhin sorkar chuan a phalsak tih a sawi bawk. 

School hawn a nih hunah pawh zirlaite school-a kal tir leh tir loh chungchangah  an nu leh pa/enkawltute thutlukna chu pawmsak  a ni dawn bawk tih minister chuan a sawi a, kuminah bik chuan attendance chu compulsory a ni dawn lo a ni, a ti. 

College-ah undergraduate level chinah chuan section khatah zirlai 25 aia tam lo awm tura tih a ni a, mahse class hi hall lianahte neih a nih chuan zirlai awm thei zat hi tihpun theih a ni thung ang. Postgraduate level bikah chuan sorkarin kaihhruaina hran a siam lo a,  university executive council-ten an siam ang. Sorkar hnuaia polytechnics leh engineering institution-te chu November 2-ah hawn vek an ni dawn a, hostel erawh hawn ala ni dawn lo thung.