Manipur buaina chungchang UNHRC-ah sawi chhuak

Extrajudicial Execution Victim Families Association (EEVFAM) leh Human Rights Alert (HRA) aiawh, human rights acitivist Babloo Loitongbam chuan Thawhṭanni khan Geneva-a United Nation Human Rights Committee (UNHRC) hmaah Manipur buaina vanga mimal dikna in a tuar dan chungchang a sawi.

Babloo Loitongbam chuan sipai hnena thuneihna sang pekna, Armed Forces Special Powers Act (AFSPA) chungchang sawilangin, he dan vanga an tuarna hriatreng nana an hman ṭhin, Manipur Anti-Repression Day vawi 20 an hman thu a tarlang. Manipur chhungah hian he dan hi hman chhunzawm a la ni reng a, sipaite'n he dan an hman sualna hnuchhuituten finfiahna ṭha tak an nei thlap chung pawhin union home ministry chuan a sipaite chu a humhim tlat zel niin a sawi.

Manipur activist hian state chhung buaina chungchangah sorkar laipui chu hma la ṭha tawk loah puhin central armed force-te chuan an tihtur an tih loh vangin civil mi thihna a pun phah a, chi leh chi inkara indona chhuak chu an ṭhelh mit zo lo nia a ngaih thu a sawi. Loitongbam chuan AFSPA dan chu UNHRC kalphung nen a inmil loh vangin hnawl se a duh tih a sawi nghal bawk.

Loitongbam chuan Manipur mipuite chu an dikna chanvo rahbeh sak a nih thu sawiin, India sorkar chuan a mipuite venghim tura a mawhphurna chu hlen zo loah a puh bawk. Manipur hi May 2023 aṭanga buai ṭan niin, tualchhung buaina chhuak vanga thi hi mi 230 an tling tawh a, mi 60,000 chuangin an chenna hmun an chhuahsan tawh bawk. UNHRC-a Loitongbam thusawi hian state chhung mipuite tawrhna chu khawvel hriattirin, mipui dikna chanvo rahbehna chu tihtawp a nih theih nan leh mawhphurhna la ngam turin thuneitute chu a nawr a ni.