Sikkim : Minister hlui Poudyal ruang chhar a ni

Sikkim minister hlui, RC Poudyal chu ni kua zet a bo hnuin Thawhlehni khan a ruang chu Teesta Canal, Fulbari-ah hmuh a ni tih police chuan an puang. Poudyal hi kum 80 mi niin kum 1970 - 80 chhoa Sikkim politics-a hming langsar tak a ni a, Rising Sun Party dintu a ni bawk.

RC Poudyal hian Sikkim legislative assembly hmasa berah deputy speaker nihna a chelh a, hemi hnu hian forest minister pawh a ni leh. Sikkim chief minister Prem Singh Tamang chuan RC Poudyal chu a ui takzet tih sawiin politician senior leh rorel thiam tak, Sikkim sorkar tan a theihna zawna thawh hlawk tak niin minister hial a lo ni tawh tih a sawi a, Jhulke Gham Party hruaitu a ni, a ti bawk.

Poudyal hi July 7 khan a chenna khua Chota Singtam, Pakyong district aṭangin chin hriat lohin a bo a, a zawng turin Special Investigation Team (SIT) din niin Thawhlehni khan Siliguri bula, Teesta canal-ah a ruang hi hmuh a ni ta a ni. Sikkim police officer pakhat chuan Poudyal chu a thuamhnaw hak leh sana bun aṭangin an hria tih sawiin lui tui chuan an chharna hmunah hian a len thla nia an hriat thu a sawi. Police officer hian hnuchhui hna chu thawh zel a ni dawn a ni, a ti.