Tripura : Sorkar rama in sak tichhia

Tripura khawpui, Agartala khaw dai, Usha Bazar-a social club lar tak, Bharat Ratna Sangha club chu sorkar rama sak a nih vangin Tripura sorkar chuan nimin khan a tihchhiat sak.

Sadar Sub-division Magistrate chuan July 7 khan club building chu ni 7 ral hmaa chhuahsan tur emaw July 15 ral hmaa an building an tihchhiat loh chhan tur sawifiah turin Bharat Ratna Sangha club president leh secretary hnenah hriattirna a lo pe tawh a ni. Hun tiam chhunga insawifiahna an dawn loh avangin nimin zing khan sorkar chuan an club building chu a tichhe ta a ni.

West District Magistrate, Dr. Vishal Kumar chuan Bharat Ratna Sangha club chu sorkar rama sak a nih thu sawiin ram teh ṭhat a nih hnuah leh lehkha pawimawh dang tihfel a nih hnuah sorkar chuan a tichhe ta a ni, a ti. He building awmna hmunah hian sorkar chuan mipui tana ṭangkai tur hmunhma dang sak a tum tih a sawi a, heng zingah hian Primary Health Care centre pawh a tel dawn niin a sawi. DM Kumar chuan club member emaw pawl emaw dan phal loh thil- land mafias, smuggling leh tender negotiations lama inhnamhnawih an lo awm a nih chuan sorkarin a en liam dawn lo a, dan a lekkawh dawn a ni tiin Tripura sorkarin 'zero tolerance policy' a kalpui mek nen pawh a inzul chiah a ni, a ti bawk.

Dr. Vishal Kumar chuan Bharat Ratna Sangha club chuan khawtlang tana thil ṭha an tihna kawngah thuneitute pawhin an thawhpui ṭhin tih sawiin tun hnaiah club mi leh sa zinga ṭhenkhat chu pawikhawihnaah an inhnamhnawih tih an hriat chhuah thu sawiin hemi avang hian an chunga hma la an ni, a ti. Kumar chuan pawikhawihnaa inhnamhnawihte bungrua pawh hrek sak an ni dawn niin a sawi. Sorkar ram nektute chu an dim dawn lo tih a sawi bawk.