Manipur-in ruihhlo dona dan thuam chak dawn

Manipur sorkar chuan ruihhlo dona kawnga hmalaknate tihchakna turin Narcotics Drugs and Psychotropic Substance rules a thuam chak dawn. 

Kar liamta khan state cabinet chuan he thutlukna hi siamin dan siamṭhat hi pass thuai beisei a nih thu sorkar thupuangtu leh minister Th Biswajit Singh chuan a sawi. Minister chuan he dan siamṭhat hnuaiah hian ruihhlo tawlh/sumdawnnaa inhnamhnawihte chu cheng nuai khat chawitir bakah, kum 2-4 chhung tantir theih an ni dawn tih a sawi. 

Chief  minister B Biren Singh kaihhruaia state cabinet meeting chuan Covid care centre-ahte senior doctor dah an rel bawk. 

Centre hrang hrangte inenkawl leh mamawh an neihte thlithlai a, ngaihtuah turin IAS officer pahnih ruat an ni bawk a ni. 

Sorkar chuan amah ringawtin Covid-19 leng mek chu a do hneh thei lo tih sawiin, minister Biswajit chuan mipuite chu hri darh tur venna kawnga kaihhruaina siamte zawm ṭha tur leh, fimkhur taka awm turin a chah.