Nagaland ministry buainaah NDA hruaitute inrawlh dawn

31st January, 2015

Naga Peoples Front (NPF) kaihhruai Democratic Alliance of Nagaland- III (DAN-III) sorkar buainaah Prime Minister Narendra Modi chuan Union Home Minister Rajnath Singh rawnin, Chief Minister TR Zeliang-a sorkar hma lam a hun a ngaihtuah dawn.

He thu hi Union Home Ministry official chuan media mite hnenah a sawi a, NDA sorkar chuan Nagland sorkar buaina chu ngun taka a enthlak reng thu a sawi. Nagaland-a rorellai DAN-III hian central-ah NDA a thawhpui a ni.

Nagaland Governor PB Acharya leh Chief Minister Zeliang chuan an buaina chungchang hi Ningani khan a hranin Prime Minister leh Union Home Minister hnenah an thlen tawh a, an inbiakna erawh sawichhuah a ni lo.

Central-a hruaitute'n Nagaland thilthleng chu an ennawn hnuah thuthlukna an siam dawn niin Home Ministry official chuan a sawi. Nagaland ministry buainaah central-a thuneitute chuan duhthlan tur pahnih an nei a, TR Zeliang-a sorkar ṭhiah a, President Rule-a dah emaw NPF MLA 22 thlawpna nei nia insawi G Kaito Aye-a kaihhruai sorkar din a ni.

Official chuan Nagaland politics dinhmun chu a ṭhat loh thu leh harsatna chinfel thuai a pawimawh thu Governor Acharya-a'n a sawi a ti. Govenor chuan Nagaland-in sum leh paia harsatna lian tham tak a tawh lai a nih vangin politics thila harsatna chu chinfel thuai a ngai a ni, a ti.

Hetihlai hian Zeliang chuan Prime Minister Modi-a a kawm hnuah thuthar thehdarhtute kawmin, Prime Minister chuan DAN-III sorkar kal lai tibuai zawnga hruaitu thlak a duh loh thu leh BJP chuan a thlawp zel tur thu a hrilh, tih a sawi.

Sum leh paia Nagaland harsatna chungchangah Chief Minister chuan Finance Minister Arun Jaitley a hmuh thu sawiin, Nagaland Afforestation leh Eco Development Project atan ODA loan cheng vaibelchhe 620 pekchhuah phalna a ngen thu a sawi a, Jaitley chuan Nagaland harsatna chu a hriatpui thu leh sorkar laipuiin ṭanpui sum a ngaihtuahsak thuai tur thu a sawi a ni, a ti.

Chief Minister Zeliang chuan a ministry-a minister bang tate post ruak hnawhkhah nan minister thar ruat thuai a tum thu a sawi bawk.