Subansiri tuikhuah siam chhunzawm tumin hma la
Arunachal Pradesh Chief Minister Nabam Tuki chuan power megawatt 2,000 pe chhuak thei tura ruahman, Lower Subansiri Lower Hydroelectric Power Project (LSHEP)-a tuikhuah siam chhunzawmna atan theihtawp chhuaha hma lak mek a ni, tih Ningani khan state assembly-ah a sawi.
Assam-a pawl ṭhenkhat, Krishak Mukti Sangram Samiti (KMSS), All Assam Students’ Union (AASU) leh pawl dangte'n tuikhuah thlang lama a nghawng turte ngaihtuaha nasa taka LSHEP an dodal hnuah December 16, 2011 khan hnathawh tihtawp a ni.
Chief Minister Tuki chuan LSHEP chungchanga BJP MLA Tamiyo Taga zawhna chhangin he thu hi a sawi a, LSHEP chungchang ngaituahin nikum December 11 leh 12 khan New Delhi-ah Union Power Ministry-in meeting a koh thu leh meeting-ah hian sorkar laipui aiawh te, Assam sorkar aiawhte, Assam-a mithiam te leh NHPC aiawh te an tel thu a sawi.
Chief Minister Tuki chuan meeting hian LSHEP tuikhuah chungchang chu ngun taka a ngaihtuah thu leh tuikhuahin harsatna a thlen theihte pawh chipchiar taka sawi ho a ni, a ti a, LSHEP aṭanga Assam leh Arunachal Pradesh-in a thlawna power 12% an dawn tur insem dan tur pawh rel a ni, a ti. LSHEP aṭangin Assam chuan power MW 533 pekbelh a phut bawk a, hei hi Union Power Minister Piyush Goel chuan meeting-ah hian a remti niin Tuki chuan a sawi bawk.
Power Minister Goel chuan LSHEP hnathawh chu tihkhawtlai zel a nih chuan sum chawibelh a sang chho zel dawn a, chu chuan hmarchhak biala investment tihna kawngah nghawng ṭha lo a thlen a hlauhawm thu a sawi bawk, tiin Tuki chuan Goel-a thusawi a sawi chhawng.
Tuki chuan LSHEP hnathawh chhunzawm thuai a nih theih nan member te chu theihtawp chhuah turin a sawm a, harsatna awmte chinfel nan sorkar aiawh leh LSHEP dodaltu pawl aiawhte telna Project Oversight Committee din a nih tawh thu a sawi bawk a, sorkar laipui chuan tuikhuah leh a nghawng thleng theite zirchiang turin high powered committee a din thu a sawi bawk. High powered committee chuan zirchianna an neih hnuah report an thehlut thuai dawn a ni, a ti.