Tripura-in BPL te hnenah man tlawmin buhfai pe dawn

Tripura sorkar chuan below poverty line (BPL) chhungkua te hnena buhfai man tlawma a pek chu chhunzawm zel a tum thu a tarlang.

State sorkar chuan kum 2013 aṭangin BPL te hnenah buhfai hi kg khat cheng hnih zelin a pe.

Principal Secretary (Food and Civil Supplies) SK Rakesh chuan he thu hi sawiin, "State sorkarin April thla aṭang­in Central Food Security Act a kalpui dawn a, he Act tlawhchhanin BPL te chu buhfai kg-ah cheng thuma pek tur an ni. Mahse state sorkar chuan BPL te hnena kg khat cheng hniha a lo pek tawh chu chhunzawm zel a tum a ni," a ti.

Rakesh chuan ration card te computer-a chhinchhiah vek a nih tawh thu leh buhfai sem dan kalphung computer hmanga kalpui vek a ni, a ti.

"Tripura-ah ration card 9,60,000 pek­chhuah a ni a, chung zinga 9,10,000 te chu computer-a chhinchhiah vek tawh a ni," a ti.