Nagaland-ah zirtirtu chuangliam 11,000 an awm : Adviser, School Education
Nagaland-a Adviser to School Education, KT Sukhalu chuan an state-ah zirtirtu chuangliam 11,000 zet an awm tih a sawi.
Kar liamta Zirtawpnia Naga Students' Federation (NSF) buatsaiha HSLC & HSSLC topper-te chawimawina inkhawm buatsaiha thu a sawiah, Sukhalu chuan kum eng emaw chen aṭang khan sorkar school-a zirlai naupang awm zat an tlahniam zel a, hei vang hian zirtirtu chuang liam pawh an tam chho zel a ni, ati. Tunah hian state chhung sorkar school hrang hrangah zirlai awm chu 1,69,548 chauh an tling tih a sawi.
National average-ah chuan zirlai 32 tan zirtirtu pakhat awm zel ang a ni tih sawiin, Sukhalu chuan, "Hemi aṭanga chhut chuan kan state-a zirtirtu mamawh zat chu 9,000 vel chauh a ni. Mahse tunah hian sorkar hnuaia zirtirtu 20,000 chuang an awm mek a, zirtirtu chuang liam 11,000 vel zet kan nei tihna a ni," a ti.
Sorkar school-a zirtirtute chu qualified leh training neih vek an nih laiin zirlai leh nu leh pate an hip zo lo a, anmahni fate ngei pawh sorkar school-ah an dah duh lo tih Sukhalu chuan a sawi. Hemi chungchang hi ngaihtuah ngun a ngai hle a ni tiin, sorkar school-a zirlai awm zat an tlakhniam zel chuan zirtirtu zat pawh tihtlem a ngaih chhoh mai a hlauhawm tih a sawi a ni.