Assam Congress President Anjan Dutta-an mual a liam ta

Hun rei tak chhung Assam Pradesh Congress Committee president lo ni tawh leh state cabinet minister hlui ni bawk, Anjan Dutta chu Pathianni zing khan All India Institute of Medical Sciences (AIIMS), New Delhi-ah a boral.

Dutta hi a thih hian kum 64 mi a ni a, May 18 khan Hospital-ah admit niin, department of Pulmonary Sciences-ah hun eng emaw chen enkawl a ni. May 12 khan Apollo Hospital New Delhi-ah hian admit leh a ni a, thawk lamah harsatna a nei tih hriat chhuah a ni a, Pathianni zing dar 7 vel khan lung ṭha lo avangin a boral ta a ni. Congress hruaitu hlun hian a nupui leh fanu pathum te a kalsan.

Dutta hian chief minister Tarun Gogoi hunlai khan transport deparment a enkawl a, hmarchhak politician zingah mite ngainat ber pawl a ni. December 13, 2014 khan APCC President atan hian ruat a ni a, a thih thleng hian a nihna hi a chelh.

Tun hnai khan Assam Chief Minister Sarbananda Sonowal chuan an enkawlna hmun AIIMS-ah hian tlawhin, amah bakah hian politician langsar tak tak Rahul leh Sonia Gandhi te pawhin an kan a ni. Anjan Dutta hian uitu a ngah hle a, amah ngaisangtu mi ṭhahnem tak te chuan a ruang an lo hmuak a ni.

Anjan Dutta thlahna hun hi Gaurisagar Block Congress Office, Sibsagar-ah hman a ni a, state chawimawina famkim nen vui liam a ni. He hunah hian Forest Minister Pramila Rani Brahma, Congress hruaitu hlun Dr CP Joshi, Chief Minister hlui Tarun Gogoi, Congress Legislative Party leader Debabrata Saikia, Congress MLA Rupjyoti Kurmi, Rakibul Hussain, BJP MLA Tapan Gogoi leh amah uitu mi ṭhahnem tak an tel. Jorhat-ah pawh Congress mi leh sa eng emaw zat chuan district Congress office-ah ama pualin hun an hmang.