AP-ah DDUGJY Scheme kalpui a ni dawn - Power Minister

Union Minister of State Power Piyush Goel chuan Arunachal Pradesh-ah Deen Dayal Upadhyaya Gram Jyoti Yojana Scheme (DDUGJY) kalpui turin hma lak mek a ni a ti a, he mi atan hian sum pawh pek chhuah thuai a nih tur thu a sawi.

June 16-17 chhung khan Panaji Goa-ah mine leh power lamah hmalakna tur ngaihtuahin conference buatsaih a ni a, he huna tel Arunachal Pradesh Power Minister T N Thongdok chuan Union minister hnenah hian an state-a DDUGJY kalpui thui tur leh sum mamawhte pe chhuak turin a ngen a ni. He conference-ah hian state leh union territory-a power minister te an tel a ni.

Union Minister Piyush Goel chuan Thongdok ngenna hi chhangin, Kharsang-ah coal base thermal plant siam mek a ni a ti a, Coal & Power Secretary chu Arunachal Pradesh-ah thermal plant din ve tura hma la turin hrilh a ni tawh a ti. Goel chuan power lamah nasa zawka hma la tura beih mek a nih thu leh Arunchal chu sorkar laipui pawhin a ngaih pawimawh zinga mi a nih thu a sawi. Heng bakah hian small hydro power projects kalpui mek Ministry of Environment & Forest-in a tihkhawtlaisak ngaihtuah a, an harsatna te sutkiansak tura hmalak a nih tur thu Union Mionister chuan a sawi bawk.

Union Minister of State Power Piyush Goel chuan minister kal khawm te chu Integrated Power Development Scheme (IPDS) hnuaiah mihring 5,000 aia tam lo chenna khua ten he scheme an chhawr theih nana proposal siam turin thu rawn a pe a, LED bulb sem chhuah chu kalpui mek zel a ni a ti bawk. Arunachal Pradesh power minister Thongdok chuan an state-a dik lo taka power hmang rutute chungah hremna pek a nih tur thu sawiin, state sorkar chuan hetianga tite dap chhuak turin hma a la mek zel a ni a ti. Heng bakah hian state sorkar chuan kum 2018 ral hma ngeiin electric in tinah pe vek turin hmalak mek a nih thu Union Minister a hrilh a ni.

PM suangtuahna

kan tihklawhtling thei : Pul

Arunachal Pradesh Chief Minister Kalikho Pul chuan Prime Minister Narendra Modi'n India power-a intodelh tura a duhna tipuitling thei turin an state chuan hma a lak mek thu a sawi. AP-ah hian hydro-power project 140 zet kalpui mek a ni a, hengahte hian sorkar company leh private power company te chuan an thawk mek a ni a ti.

Chief Minister chuan sorkar laipui chu an state-a hydro power project kalpui mekah company ten awlsam zawka hna an thawh theih nana single window clearance system hman phalsak tura a duh thu a sawi. Pul chuan,"Hydro power project kalpui mekte hi beisei anga a hlawhtling theih a nih chuan Prime Minister Narendra Modi-a'n India chu power-a intodelh ram ni tura a lo suangtuah ṭhinna chu a hlawhtling thei dawn a ni" a ti. State sorkar chuan private te tana loan rulh hun chhung kum 10 ni ṭhin chu kum 25-30-ah pawhsei a nih tur thu a sawi bawk. Tun dinhmunah private loan la te chu kum 10 chhunga rul zo tura tih an nih thu sawiin, hydro project kalpui hian hun a duh rei ṭhin avangin loan rulh hun chhung pawh hi kum 30 thlenga pawh sei state sorkar chuan a remti a ni a ti.

Union Power Ministry chuan Arunachal Pradesh-ah hian hydro power project 140 zet kalpui a nih tarlangin, zawh fel a nih hunah chuan power MW 41,500 zet a pe chhuak thei dawn a ni. Project ṭhenkhat chu forest leh river board clearance pek chhuah kawngah harstana a awm avangin tihkhawtlai an ni. Arunachal Pradesh-a power project hna thawh mek te hi zawh fel a nih chuan India-in power-a a indaih lohna nasa tak chu a phuhru thei tura beisei a ni.

CM Pul chuan hydro power project lian tham power MW 1,000-2,000 pe chhuak thei tur kalpui ni thei se a duh thu sawiin, power hian eng tiang chiahin nge a ṭha zawngin economy a nghawng theih tih hi mipuite hriatah pho chhuah ni thei se a duh tih a sawi. Siang-a hydro power project kalpui mek power MW 10,000-12,000 MW pe chhuak thei tur chu Indian subcontinent-a hydroelectric dam lian ber a nih thu a sawi bawk. Pul chuan China chu power-ah a intodelh tih sawiin, China sorkar-ina MW 22,000 pe chhuak thei tur 'Gorges Dam' hydroelectric plant chu khawvelah a lian ber a ni a ti a, hmasawnna tak tak thlen tur chuan inkalpawhna leh power chu mamawh bulpui ber a ni a ti.