Meghalaya : KSU-in state pawn lam mi dan loa hna thawk 2500 thawn let

Khasi Students Union (KSU) president Lambokstarwell Marngar chuan tun hnaia state pawn aṭanga Meghalaya chhunga hnathawh phalna nei lote an dapna aṭangin, mi 2,500 chuang dan loa hnathawkte chu an thawn kir tih a tarlang. KSU hian ni 12 liam ta chhungin Khasi-Jaintia huam chhunga in sakna hmunte an endik a ni.

KSU president chuan state sorkarin kum 2016-a a pawm tawh, Meghalaya Residents Safety and Security Act (MRSSA) chu a taka hman a tum loh avanga an dodalna lantir nan leh Inner Line Permit (ILP) hman a nih ngei theih nana sorkar kar nan dan loa hnathawk dap beihpui hi a hma aia ngawrhin an kalpui dawn tih a sawi. Hetianga hma an lak chhan hi state chhungah hnathawk tura lut an tam lutuk vang a ni, a ti. Marngar chuan tlawmngai pawl dangte nen an hma lam huna hma lak dan tur an sawi ho dawn a ti bawk.

Marngar chuan state pawn lam mi, hnathawka awm mi 2500 chuang zet document felfai lo an awm tih sawiin heng mite hi India khua leh tui an nih leh nih loh pawh a chiang lo a ni, a ti. KSU president chuan sorkarin heng mite lakah hian thubuai engzat nge an ziah luh tih hriat an duh thu sawiin, anmahni chhawrtu contractor-te chu dan an bawhchhiat avangin hremna pek an ni em tih pawh zawhna lian tak a nih thu a sawi. KSU mi leh sa zinga state pawn lam mi endik ṭhinte man an nih chungchang pawh sawilangin Marngar chuan, sorkarin dan a kenkawh theih nana pui an nih zawk laiin a letlingin anmahni thua dan lekkawh anga puh an ni zawk hlauh niin a sawi.

KSU president chuan Meghalaya sorkar chu dan loa state chhunga hnathawkte laka dan kengkawh ṭha loah puhin dan a siamte chu a hmang ṭangkai lo a ni, a ti. Sorkar chuan dan thar siam aiin dan awmsa hmang ṭangkai se a duh tih a sawi bawk. Marngar chuan Shillong khawpui chhunga Bangladesh mi paruk an manten state chhung an lo luh dan an hriatpui loh thu sawiin hei hian sorkar chak lohzia a tilang a ni tiin, hetiang thil hi ram leilung fate tan a hlauhawm a, harhchhuah a hun takzet tih a sawi bawk.