Assam : Cachar-a mi pathum thihnaah HSA lungawi lo

Hmar Students Association (HSA), Joint Headquarters Delhi chuan Thawhlehni zana security force nen an inkahnaa thi, village vollunteer-te chunga thihna thleng an dem tih an tarlang.

HSA chuan Assam police kuta thi - Lallungawi Hmar, Lalbiekkung Hmar leh Joshua te chu Kuki-Zomi-Hmar village volunteer an nih thu sawiin, Meitei kalfawr pawl laka an khaw venghimtute an ni tih an tarlang. Heng mite hi July 16 vek khan Assam police chuan an man a, a hnu lawkah an thih thu hriat a ni leh ta a ni, an ti. Police kuta an awm laia an thih avang hian he thihna thleng chhui chian hi an phut tih tarlangin, ṭan lam nei loin chhui se an duh tih an sawi tel bawk. Cachar police-in mi pathumte chu inbeihnaa thi anga an sawi chu man an nih hnu darkar 24 ah inbeih chu a thlen chauh avangin awih harsa an tih thu an tarlang tel bawk.

Hmar zirlai pawl hian police kuta thite hian rorelna dik an hmuh ngei a duh tih tarlangin, an kalsan tak an chhungte pawh zángnadawmna pek ngei an phût bawk. National Human Rights Commission (NHRC) leh thuneitu dangte chuan mihring dikna chanvo rahbehna thleng ṭhin chu chhui se an duh thu leh, dan ang takin hnu chhui ṭhin ni se an duh tih an sawi.

Cachar-a thihna thleng chungchangah hian Cachar police thuchhuah siam danin helpawl ni ngeia rin, ralthuam tawlh ruk tumte chu Bhuban Hills an pan laiin an lo dap a, hetah hian Ak 47 rifle, single barrel rifel leh pistol pakhat an man sak a ni. Police chuan an mi mante chu thu zawtfiahin anni chuan an pawlte chu Bhuban hills hualin an awm tih leh, Assam-Manipur ramriah pawikhawihna thlen an tum niin an sawi. Assam police-te chuan Bhuban hills-ah helpawl dap beihpui thlakin helpawl nen hian an inkap ta a ni. He inkahnaah hian helpawl mi pathum chuan hliam na tak tuarin Sonai PHC lamah phurh phei an ni a, hetah hian an hliam tuar loin an boral niin Cachar police-te chuan an tarlang. He inbeihnaah hian Cachar police pathum chuan hliam tuarin an lirthei pakhat tihchhiat a ni bawk.