Tripura : Buaina hmanga politics khelah Congress-in BJP puh

Congress party hruaitu Ajoy Kumar chuan BJP chu Tripura-a buaina chawkchhuaktuah puhin, thuneihna an chang thei dawn a nih chuan buaina chawhchhuah an hreh lo, a ti.

Ajoy Kumar chuan prime minister Narendra Modi-a'n helna nuaibo a nih tur chungchang a sawi chu chhang letin, Jammu and Kashmir-ah tun hnai mai khan India sipai pali kahhlum an ni tih a sawi. BJP chuan Tripura-ah an elpuite tharum hmanga an beih bakah an that ṭhin nia sawiin, hetianga pawisawi lo beia tharum thawhna thlen hi helpawl thil tih dan ṭhin a ni, a ti. "Tripura hian hun harsa tak a tawk mek a ni" a ti bawk.

Congress hruaitu Kumar hian kum 2022 kuma tharum thawhna chhuichiang tura Tripura-a kalte beih an nih chungchang pawh sawilangin, he thil thlengah hian sorkar chu a mawhphurtu a ni, a ti a, BJP chu thuneihna an chan theihna tur a nih chuan buaina an chawkchhuah hreh lo tiin,"BJP chuan thuneihna an chan theihna turin Manipur-ah Kuki leh Meitei inkarah buaina an chawkchhuak a, tunah Tripura-ah tribal leh non-tribal inkarah buaina an thlen leh a ni" a ti. Congress leh BJP inan lohna sawiin an party chuan thuneihna chu tu pawhin chang se pawi an ti lo a, mahse Congress chuan thuneitute chu India ṭhenhrang lo turin an duh niin Kumar chuan a sawi.

Tripura, Dhalai district-a Ganda Twisa sub-division-ah tunhnai khan tribal leh tribal ni lote inkarah buaina chhuakin dawr 30-40 leh in 20-25 inkar tihchhiat a ni tih district thuneitute chuan an tarlang. He buaina kaihhnawihah hian mi pali man an ni tawh a, venhimna pawh khauh lehzuala kalpui a ni bawk.