Sikkim Legislative Assembly-ah eptu pawl an awm lo

Kumina Sikkim assembly inthlan neihah khan Sikkim Krantikari Morcha (SKM) chuan assembly-a seat 32 awm zinga seat 31 ah hnehna an chang a, eptu pawl Sikkim Democratic Front (SDF) chuan seat khat chauh an la ve a ni.

Eptu pawl, SKM MLA awmchhun, Tenzin Norbu Lamtha chuan rorellai party, SKM hi a zawm leh tak vangin Sikkim Legislative Assembly-ah eptu lam an awm ta lo.

Hetih lai hian SKM hotu leh chief minister Prem Singh Tamang chu inthlanah hian bial pahnih, Soreng-Chakung leh Rhenock aṭangin thlan tlin a ni a, Soreng-Chakung bial zawk a chhuahsan dawn a, he bialah hian by-election neih a ngai dawn a ni. A nupui Krishna Kumari Rai chu Namchi bial aṭanga thlantlin ni mah se, result puan a nih hnuah MLA a nihna a bansan avangin a bialah hian by-election neih a ngai ve leh dawn bawk.

By-election neihna tur bial pahnihah SKM chu an chak leh a nih chuan, an state-a assembly bial awm zawng zawng chu an party hian an hui vek dawn a ni.

Election Commission of India (ECI) chuan Sikkim bial pahniha by-election neih hun tur hi an la tichiang lo a, hetih rual hian state chhunga party hrang hrangte chuan inthlan nei tur hian inbuatsaihna an ṭan tawh thung. Eptu lam chuan Sikkim assembly chu opposition awm lohna assembly a nih loh nan ṭan an la a, BJP state president pawh inthlan lo awm tur chungchangah BJP national hruaitute hmuin Delhi lamah a cham mek a ni.