Panchayat inthlanah BJP in hnehna a chang dawn : Tripura CM

Tripura chief minister Manik Saha chuan Panchayat inthlan an neih turah an party, Bharatiya Janata Party (BJP) candidate-te chuan seat zawng zawngah hnehna an chang dawn niin a sawi.

Tripura State Election Commission chuan Panchayat inthlana vote thlak hun atan August 8 chu ruatin, August 12-ah vote chhiarin result puan a ni ang.

CM Manik Saha chuan BJP chungah state mipuiten rinna an la nghah avang leh an puihna avangin Panchayat inthlanah hnehna an chang ngei dawn tih a sawi. BJP aiawha dingte pawn an tling ngei an inring a, an thla a muang hle a ni, a ti.

Panchayat inthlan neih tura chuh tumte tan Ningani kha nomination paper an thehluh theih hun tawp a ni a, Agartala leh Udaipur-a nomination paper thehluhna hmunah BJP candidate thlawptu ṭhahnem tak an pung khawm niin Saha chuan a sawi.

Tripura BJP president Rajib Bhattacharya chuan state chhunga eptu pawl, Congress leh CPI(M) te chu bei zuiin hma lak tum dan mumal an nei lo an ni, a ti. Heng party hruaituten politics an khelh chhan hi mimal hlawkna an um vang tiin a puh bawk. BJP state president chuan Gram Panchayat, Panchayat Samiti leh Zila Parishad-a seat ruak awmte chu an chuh kim dawn tih sawiin August 12-ah seat awm zawng zawnga hnehna an chan thu puan a ni dawn tih a sawi bawk. Bhattacharya chuan eptu pawlten mipuite emaw an party mi leh sate hnen aṭangin emaw thlawpna an dawng lo tih a sawi. BJP thil tum ber chu mipuite hmasawn nana hnathawh a ni, a ti.