Assam cabinet-in Muslim-te inneihnaa dan dinglai a titawp dawn

Assam chief minister Himanta Biswa Sarma chuan Assam Muslim Marriages and Divorce Registration Act, 1935 chu cabinet ṭhukhawm chuan titawp turin a pawm tih a puang. He dan titawp tura thutlukna siam a nih chhan hi kum tling loa innei a tlem theih nana an hmalakna a ni.

Chief Minister Sarma chuan Assam cabinet thutlukna hi Ningani khan puangin "rorelna dik awm theih nana hmalakna pawimawh tak a ni" a ti. Kum tling lo naupangte chu danin a humhim belh theih dawn a ni, a ti bawk. Himanta chuan Assam Repealing Bill, 2024 dan hnuaiah Muslim-te inneih chungchanga dan dinglai chu tihtawp a ni dawn tih puangin Assam-a cheng, Muslim nupa tuak tharte tana an innei a ni tih chhinchhiahna dan thar chu assembly session lo awm leh turah put luh a ni dawn tih a sawi bawk.

Assam sorkar hian kum tling loa innei tihtawp a nih theih nan ṭan a la nasa hle a, CM chuan kum 2022 April aṭanga June 2024 inkarah naupang kum 13-19 inkar zinga naupai/rai zat an tlahniam tih nimin khan a tarlang bawk. Kum 2022 April khan tleirawl, kum 18 hnuai lam zinga rai 9,330 an awm laiin kumin June thlaah erawh rai hi 3,401 chauh an awm tih a tarlang a, 64% laiin a tla hniam tih a sawi. Himanta chuan naupang inneihna a tlakhniam theih nan hma an la chhunzawm zel dawn tih sawiin, thla 6 danah endik hna uluk takin kalpui ṭhin a ni dawn a ni, a ti.