PM-Kishan scheme tichingpena puh Manipur SDC pathum suspend

Manipur sorkar chuan an state-a PM Kisan Samman Nidhi scheme tihchingpennaa inhnamhnawiha puh sub-deputy collector (SDSC) pathum a suspend. 

Officer suspend-te hi Robert Okram (LA/SDC, Bishnupur), Salam Bimoljit Singh (LA/SDC headquarter) DC office leh Rahina Sahni, (LA/SDC, Lilong) te an ni. 

State revenue department-in suspend-na a tihchhuahah, heng officer-te hi PM Kisan Samman Nidhi scheme hnuaia hamṭhatna dawngtute hming lem siamah puh an ni tih a tarlang.

He scheme hi loneitu harsa zawkte puihna tura duan niin, small and marginal farmer-te chuan kum  khatah ṭanpuina Rs 6,000 an dawng thei dawn a ni. Kum 2018 December thla khan prime minister Narendra Modi kaihhruai sorkar laipui chuan he scheme hi tlangzarhin, cheng vaibelchhe 75,000 scheme hmang hian ram chhunga loneitu maktaduai 125 te chhawmdawlna pek tum a ni. 

Manipur-a he scheme dawng turte hming chu official website-ah dah luh a ni a, hetihlai hian Bishnupur district aṭanga dawng tura hming ziah zingah hming lem eng emaw zat an awm nia sawi a ni. Officer-te chuan he thil hi tisual palh niin, district danga mite hming dahluh palh niin an sawi a, mahse an insawifiahna hi tualchhung miten an pawm lo. Sorkarah  thlenin, dik lo taka thiltihnaa inhnamhnawih officer-te laka action la turin an phut a, hei vang hian officer pathumte chu suspend an ni. 

Sorkar chuan hemi chungchang hi chhui chian a nih tur thu a sawi bawk.