Hri kai awm vangin Manipur CM hlui quarters khar

Manipur chief minister hlui leh eptu pawl, Cong­ress party leader O Ibobi Singh chu a personal guard leh a in vengtu zinga mi 11-ten Covid-19 an kai tih hmuh chhuah a nih avangin a quarters chu midang tlawh theih loha khar rih a ni. 

Ibobi Singh vengtuten hri an kai tih hriat a nih hnuah CM hlui leh a chhungte pawh test ve nghal an ni a, an result a negative vek a ni. Mahse Imphal-a Babupara-a an chenna in erawh khar rih a nih thu official-te chuan an sawi. 

CM hlui hian Aguust 31 khan Imphal Congress Bhavan-a inkhawm a hmanpui a, he hunah tel party hruaitu leh worker-te pawh an sample lak nghal vek an ni a, Imphal Congress Bhavan pawh damdawi hmanga kah thianghlim nghal a ni bawk. 

Nilaini khan Manipur-ah hri kai hmuh chhuah tar 125 an awm belh leh a, an state-a hri kai hmuh tawh hi 6,507 an tling tawh. Hri kai zinga 29 in an thihpui tawh bawk a ni. Hri kai hmuh thar zinga mi 123 chu hmun danga zin chhuahna nei lo, tualchhung aṭanga kai an ni. 

Hemi ni vek hian hri kai zinga 157 chu enkawl dam niin enkawlna hmun hrang hrang aṭangin chhuah tir an ni. Hri kai zinga 4.607 chu enkawl dam an ni tawh a, state recovery rate chu 70.80% a ni tawh.