Hmarchhak CEM-ten home ministry hmu dawn : Pradyot Debbarma

Tripura tualṭo party, Tipra Motha chairman hlui Pradyot Debbarma chuan hmarchhak Sixth Schedule area 10 aṭanga an Chief Executive Member-te chuan Autonomous District Council (ADC) thuam chak dan tur sawi ho turin sorkar laipuia home ministry an hmu dawn tih a sawi.

Pradyot Debbarma kaihhruai hian hmarchhaka ADC 10 aiawha kalkhawmte chu Inrinni khan Delhi-ah an inhmukhawm a, he hunah hian ADC chak zawk neih theih dan turte sawi ho a ni. Debbarma chuan ADC in a huamchhunga hna ṭha zawka a thawh theih nan thuam chak a ngai a ni, a ti. Delhi-a an inhmuhkhawmnaah hian ADC in harsatna a tawh leh hma lam pana a kal theih dan turte sawi ho a ni tih a tarlang bawk.

Tipra Motha party hruaitu hian India danpui 125th Amendment chungchang pawh sawilangin, he dan Parliament in a la pawm loh hian ADC mipuite chu a nghawng thei dawn tiin, mipuiteah zawhna pawh a tam hle a ni, a ti. Hemi chungchang sawipui tur hian union home ministry hmuh an tum tih a sawi a, CEM 10-te chuan 125th Amendment thlen chin hriat duhin uion home minister Amit Shah pawh zawhna an siam tih a sawi bawk. Debbarma chuan,"Kan ram, kan mipuite humhim tur kan ni a, chutiang chu sorkar laipui pawh hian min phalsak a ni. Chuvangin 125th Amendment chungchanga kan dinhmun dik tak kan hre duh a ni" a ti.