Meghalaya : MeECL hnuaia casual worker leh a ngheta thawkte hlawh inang pe turin ti

Meghalaya High Court chuan Meghalaya Energy Corporation Limited (MeECL) hnuaia casual workers leh contract-a a thawk mi 1,300-te chu an hnathawh ang thawk, a ngheta thawkte hlawh ang pe turin thupek a tichhuak. He thupek hian cleaner, peon, meter reader leh lineman-te a huam ang.

MeECL Progressive Workers Union (MPWU) chuan HC-ah hian petition thehlutin, justice Wanlura Diengdoh chuan hlawh inang pe turin a thupek a chhuah ta a ni. Court chuan rorelna a tihchhuah aṭanga thla hnih chhungin MeECL chu hlawh pek dan thar hmang turin a hriattir bawk.

MPWU president Man­tiphrang Lyngdoh Kiri chuan court thutlukna chuan a tilawm hle tih sawiin MeECL hnuaia casual worker-te tan a ṭangkai dawn hle tih a sawi bawk. Hun rei tak an lo suangtuah tawh chu tihhlawhtlin a ni dawn ta a ni, a ti.

MeECL hian sum lakluh kawngah hma lam pan mah se a nghet loa thawkte an regularise theih mai lo a, thawktu zinga kum 20 aṭanga 25 thawk tawh pawh a ngheta an dah theih loh bakah EPF hamṭhatna pawh an pe thei lo a ni. Meghalaya power minister AT Mondal chuan MeECL pawisa hloh chu 25% aṭangin 9% ah a tlahniam tih sawi mah se hnathawktute hamṭhatna hi an siamsak mai thei lo a, hei vang hian thawktute hi court-ah hian a zualko ta a ni. Court in thuchhuah thar a siam tak avang hian MeECL hnuaia casual worker-te chuan a ngheta thawkte hlawh ang leh hamṭhatna dang an dawng thei dawn ta a ni.