Arunachal : Police-in sikul bula vaihlo zuar an dap

Arunachal Pradesh police-te chuan Inrinni liam ta khan sikul aṭanga meter 100 bial chhunga vaihlo leh a kaihhnawih zuarte an dap. Chipu Police station team-te chuan vaihlo dap beihpui thlak hna hi Itanagar-ah kalpuiin, deputy commissioner Talo Potom pawhin a telpui a ni.

Itanagar DC Potom chu he hunah hian tel ve in thil tisualtute chu nakin hunah an tisual leh a nih chuan Cigarettes and Other Tobacco Products Act (COTPA) dan hnuaiah hrem an ni dawn tih a sawi. Potom chuan hetianga indap hna hi kalpui chhunzawm zel an tum thu leh, vawikhat an ngaihdam tawh hnuah zuar lui an awm leh em tih enfiah an tum tih a sawi a, hemi bakah hian zirna-in chhehvela zirlaite tibuai thei thildang a awm loh nan an thil tih chu a pawimawh tih a sawi bawk.

Arunachal khawpuia vaihlo dap hna hi Itanagar SP Rohit Rajbir Singh kaihhruaina hnuaiah neih niin sikul hrang hrang- VKV School, SLSA, KV2 leh sikul dangah meter 100 huamchhungah vaihlo zuar an awm leh awm loh hi sawi lawk loin an enfiah a ni. Arunachal-ah hian vaihlo leh ruihlo dang dap hna hi kalpui a ni fo a, kumin May 8 khan Itanagar chhungah vek vaihlo leh ruihhlo zuar dapna hi neih niin dan bawhchhiate chu COTPA Section 6 (a) leh (b) dan hnuaiah Rs 200 chawi tir an ni.