Bangladesh buainain hmarchhak a nghawng

Bangladesh tualchhung buaina tlansan tuma hmarchhaka rawn lut an pung zel a, hmarchhak state - Meghalaya, Assam leh Tripura chu Bangladesh aṭang hian an pan nasa bik a ni.

Bangladesh nena kilometer 856 ramri nei, Tripura-ah zirlai 150 chuang himna zawngin an lut tawh nia tarlan a ni. BSF tarlan danin heng mite hian hmun hrang hranga Integrated Check Posts aṭangin Tripura hi an lut a, India zirlaite bakah ramdang zirlaite pawh an tel niin an sawi bawk. BSF chuan heng mite hi an document a felfai tih tarlangin, mi tam zawk an la luh belh la rinawm thu an sawi a, ramriah venhimna an uluk lehzual niin an tarlang bawk.

Meghalaya sorkar chuan India mi zirlai leh khualzin, Bangladesh-a awm, mi 200 chuang chu an state-ah an hruai lut tawh niin a sawi. Heng zingah hian Meghalaya state aṭang kal zirlai 39 an tel nia tarlan a ni. Meghalaya sorkar chuan Bangladesh aṭanga India mi hruai haw tur hian a inpuahchah nasa hle a, Tripura sorkar nen venhimna chungchangah inbepawp rengin Sonamura border aṭanga an inhlanchhawn dan tur pawh fel fai takin an buaipui a, India mite him nan venhimna pawh uluk taka kalpui a ni bawk.

Assam chief minister Himanta Biswa Sarma pawhin Assamese tangkhangte hruai hawna kawnga pui turin sorkar laipui a ngen ve bawk. Sarma chuan Bangladesh a thil thleng mek avangin hmanhmawh taka an chet a ngai tih a sawi. Sorkar laipui hotute chuan Bangladesh medical college hrang hranga Assam zirlai awm mekte thiar chhuak turin hma an la reng tih a sawi.