Assam-ah Yoga Centre block 300-ah din a ni dawn

Assam-ah chuan Thawhlehni khan International Yoga Day urhsun taka hman a ni a, he ni denchhen hian state sorkar chuan district zawng zawnga block tinah yoga centre din a nih tur thu a sawi.

Assam Chief Minister Sarbananda Sonowal chuan International Yoga Day hi a bial Majuli-ah a hmanpui a, Health and Education Minister Himanta Biswa Sarma chuan a ṭawiawm a ni. Majuli-ah hian zirlai leh mipui ṭhahnem tak an pungkhawm a, Sonowal chuan thu sawiin, Majuli mipuite chu duhsakna hlanin, yoga chuan taksa leh rilru lamah hriselna a thlen a ni a ti a, khawvel chuan Yoga pawimawhna hi a hre chiang tulh tulh a ni a ti. Assam chu state hmasawn leh ṭhang chak a nih theih nan thawhrimna, taimakna leh thuawihna te a pawimawh a ni a ti a, chu mi tur chuan Yoga hian nasa takin min pui thei a ni a ti. Sri Sankaradeva leh Sri Madhabdeva te chuan Yoga hmang hian state-ah danglamna thlen tumin nasa takin an bei a ni a ti bawk. Chief Minister Sonowal chuan Prime Minister Narendra Modi chu fakin India ram mai ni lo, khawvel puma Yoga a lar theih nana a hmalakna te chu ropui a tih thu a sawi.

Health and Education Minister Sarma chuan, "State sorkar chuan block 300-ah yoga centre din turin thutlukna a siam a, hei hian naupang aṭanga kum upa zawk thlengin a huam dawn a ni" a ti. International Yoga Day chu state, district, sub-divisional, block leh panchayat zawng zawngah lawm a nih thu a tarlang bawk.

International Yoga Day hi Tripura-ah pawh hmun hrang hrang 70 zetah lawm a ni. Sports, Youth Affairs, Education and Health Department te chuan a lawmna hi buatsaihin, zirlai bakah mipui ṭhahnem takin a lawm nan kawng an zawh. Sports and Youth Affairs Minister Sahid Chowdhury chuan kumin chhungin class I-XII inkar tan zirna in 105-ah Yoga course leh training te kalpui a nih tur thu a sawi. Tripura Governor Tathagata Roy chuan International Yoga Day hi a hmanpui a ni.