Samak kap leh tawh

India ram leh khawvel huap pawha ramsa vang tawh tak leh Assam state pawh-in a larpui, Samak ki pakhat nei, one-horned rhinoceros chu Inrinni zan khan National Park chhung-ah sapeltuten an kap leh a, a ki an la nghal bawk.

Park official chuan, "Bagori range-ah security guard te chuan Samak nu thi an chhar a, an hmuh hian a ki a lo awm tawh lo a ni" a ti. Forest official pawhin, "Security guard te chuan Amkathoni forest camp-ah silai puak ri an hria a, thawm an hriat veleh hian an che chhuak nghal a, nimahsela sapeltute hi an tlanchhe hman a ni" a ti. Sapeltute chet dan hi chhui nghal a ni a, Biswanath Chariali aṭangin Park-ah hian an lut nia hriat a ni a, .303 rifle hmangin Samak hi an kap nia hriat a ni. Kumin chhungin Kaziranga National Park-ah hian Samak 10 lai kah hlum an ni tawh. British lal fapa Prince William leh a nupui Kate Middleton te chuan Kaziranga National Park hi rawn tlawhin, zan hnih hun an hmang a, Park-a an awm lai ngei hian sapeltute chuan Samak hi an kap a, sawi zui a hlawh hle. Kar kalta chhung khan State Forest minister Pramila Rani Brahma chuan park hi vawi thum zet a tlawh a, venhimna ṭha zawk kalpui turin hma a la mek a ni. Tunhnaia thil thleng avang hian Park Director chu suspend a lo ni tawh bawk. Sorkar laipui pawhin venhimna ṭha zawk kalpui a nih theih nan state sorkar chu hma la turin a nawr ve reng bawk.