Assam-ah 'Tobacco Free' SMS Campaign ṭan

Assam sorkar chuan state chhunga zirna in hrang hrang te 'tobacco free' an nih theih nana SMS campaign a buatsaih chu ṭan a ni ta. Rashtriya Madhyamik Siksha Abhiyan (RMSA) leh Sarba Siksha Abhiyan (SSA) school-a Principal leh head master te chu SMS hi thawn an ni tawh a, an school ṭheuh te 'tobacco free' a nih theih nana hma la tura ngen an ni.

State education department chuan zirnain hrang hranga Principal leh Head bakah district education officer te chu campaign kalpui tur hian hriattirna a chhuah tawh a ni. Secondary Education Department Secretary R C Jain chuan, "SMS campaign chu June 18 aṭang khan ṭan a ni ta a, hmalakna hmasa atan zirnain thuneitute hnenah SMS 4,000 thawn chhuah a ni a, school tin te 'Tobacco Free'-a puan a nih theih nana hma la tura hriattir an ni, campaign hi kalpui zel a ni ang" a ti. Assam-ah hian state sorkar-in a enkawl school zawng zawng te chu 'Tobacco Free' a puan a nih vek theih nan hma lak mek a ni. Assam-ah hian naupang 140 zet te chuan nitin meizial an zu ṭhin a, puitling nuai 85 zet te chuan vaihlo leh a kaihnawih te an ti ṭhin tih Global Adult Tobacco Survey 2010 chuan a tarlang.

Kumina World Environ-ment Day hman a nih ṭum khan, Healis-Sekhsaria Institute for Public Health, Tata Trusts, Assam Education Department, Barooah Cancer Institute te chuan Tobacco Free Educational Institutions (TFEI) campaign neih a nih theih nan hmalak a nih tur thu an lo puang tawh a ni.