Manipur : Kangpokpi-ah raltlante ṭanpuina sem

Manipur-a Textile, Commerce and Industry minister Nemcha Kipgen chuan Kangpokpi district-a raltlan mi 2,000 chuang hnenah ṭanpuina sum Rs nuai 20 a sem. He ṭanpuina hi chhawmdawlna-in 11 a raltlante awm mekte hnenah pek a ni.

Sorkar laipuiin raltlante tana thawmhnaw leh inchhungkhur mamawh lei nana ṭanpuina tur sum a pek chu Kipgen hian a sem chhuak a ni. District Institute of Education and Training Centre, Leikop relief camp-a awmte hnenah Rs 1,000 ṭheuh semin sorkar laipuiin raltlante hnuchhawn mai loa an tana ṭanpuina a ruahman chuan a tilawm takzet tih a sawi. Minister Kipgen hian chhawmdawlna-ina awm mek raltlante chuan sorkarin hamṭhatna a siam hmang ṭangkai a, an thiamnate chu damkhaw chhuah nana hmang turin a duh tih a sawi.

Nemcha Kipgen hi Kangpokpi district comissioner Mahesh Chaudhari leh ADC Kangpokpi Shokhongam Baite bakah thuneitu dangten an ṭawiawm a ni. Kipgen chuan puantah lama tuite tan puantahna hmun siamsak an tum tih sawiin, district thuneitute chuan an puan zawrhna tur ruahman se a duh tih a sawi bawk. Manipur-a buaina a chhuah hnuah state chhungah raltlan mi 60,000 chuang an awm mek a, heng bakah hian state pawn lama inhumhimna zawng tam tak an awm bawk.