Sikkim : Journalist-te tan pension siamsak dawn

Sikkim chief minister Prem Singh Tamang chuan Press Club of Sikkim din cham vawi 22-na hmanpuiin, he hunah hian thuthar thehdarhtute tana hamṭhatna thar siamsak turte a sawilang a, heng zingah hian Chief Minister Fund aṭanga pension siamsakna tur pawh a tel a ni.

PS Tamang chuan thuthar thehdarhtute puala award sem ṭhin pahnih- Kanchenjunga Kalam Puraskar leh Lagansheel Yuwa Patrakar award pawisa fai ken tel chu Rs 1,01,000 leh Rs 51,000-ah tihpun a ni dawn tih sawiin, Press Club of Sikkim din champha lawmna tur sum chu Information and Public Relations (IPR) Department chuan kum tin a thawh ve ṭhin dawn tih a sawi bawk.

CM chuan Sikkim-a journalist kum upa tawhten hna an chawlhsan hnu pawha pawisa eng emaw an dawn ve theih nan pension scheme siam an tum tih sawi bawkin, he pension dawng thei chin thliar chu Press Club of Sikkim leh IPR department kutah a awm dawn a ni, a ti. Pension atana sum hman tur hi Chief Minister Fund aṭangin grant-in-aid anga pek a ni ang.

Golay hian thuthar thehdarhtute tana hamṭhatna a puan thar zingah hian Press Club of Sikkim member zinga damlo inenkawlna senso sorkarin a tumsak dan tur pawh telin, hemi chungchang sawi ho tur hian Sikkim sorkar chuan Central Referral Hospital (CRH) Manipal leh IPR Department te chu meeting a neihpui dawn a ni. Sikkim CM hian nitin chhuak leh kartin chhuak chanchinbua advertisement tih man pawh a khat tawka ennawn a ni dawn tih a sawi bawk.