Assam : APSC chairman hlui leh midang 32 thiam loh chantir

Gauhati High Court chuan Assam Public Service Commission (APSC) in Agriculture Development Officer (ADO) hna lak dana thil fel lo awm chungchang a ngaihtuahnaah, nimin khan thutlukna siamin ASPC chairman hlui Rakesh Paul leh midang 32 te chu thiam loh a chantir.

ADO hnaruak lak tur hi kum 2013 khan tihchhuah niin he hna laka a tlingte hian APSC official-te chu thamna an pe nia sawi a ni. Hetih hunlaia APSC chairman Rakesh Paul hi thil dik lo tihnaa a bultumtu ber leh a kaihhruaina hnuaia thil thleng a nih vangin thiam loh chantir a ni. ADO hna lak bakah hian APSC hna lak danga thamna pek vangin APSC hi chhui a la ni reng bawk.

APSC hna laka thil dik lo awm hi kum 2015-16 khan haichhuah niin, Gauhati High Court chuan chhuichianna leh dan anga thubuai kalpui a nih hnuah thutlukna hi siam a ni. Court chuan mi 33 thiam loh chantirin he thubuaia inhnamhnawihna nei nia puh mi 10 erawh an thiam lohna a hmu lo thung.