Assam : Hmar mipuiten ṭhalai pathum thihna chhuichian phutin kawng zawh

Cachar district, Assam-ah tun thla ni 17-a police leh helpawl inbeihnaa thi anga sawi, Hmar ṭhalai pathumte thihdan chhuichian phutin Thawhṭanni khan Hmarkawlien khua, Cachar district-ah kawng zawh a ni.

Hmar ṭhalai pathumte hi- Lalbiekkung Hmar, Joshua Hmar leh Lallungawi Hmar te niin Cachar police lam tarlan dan chuan helpawl nen an inkah ṭuma thi niin an sawi. Mahse he inkahna hi July 17 a thleng niin heng mi pathumte erawh July 16 khan police-te chuan an man tawh thung. Hemi a nih avang hian police-te kutah thi ngei nia rinna a lian hle a, Hmar mipuite chuan chhuichian an phut a ni.

Cachar police thil sawi danah thil fel tawk lo leh inkalh a awm vangin Hmar mipuite chuan police thusawi hi rin har an ti a, thil dik tawk lo a awm ngei niin an ngai. Social media lamah ṭhalai pathumte hi man an nih laiin police tan buaina an siam lo a, ralthuam an keng lo bawk tih a hmuh theih a ni. Hemi hnu hian police-te chuan hmun dangah hruaiin thah an nih hnuah police lamin thil thlen dan an sawi fiahna ti awihawmtu atan Kevlar jacket haktir leh hnuhnawh a ni, an ti.

Hmar mipuite chuan an ṭhalai pathum man an nih laia danin police mante venhimna pek a phut ang pek an nih loh vang leh hemi hnu lama an thih tak mai avangin dan phal loh, inthahna ni ngeiin an ngai. He thihna thleng chhui chian hna hi Assam pawn lama IGP officer chin kutah dah ni se an duh a, hleih nei loa chhui chiang theitu kutah hnuchhui hna hi dah an duh a ni. Hemi bakah hian thita chhungte tan zangnadawmna Rs vbc 1 ṭheuh pek an phut bakah Mizoram doctor-ten post mortem se an duh tiin Assam chief minister hnenah memorandum an thehlut. Inbeihna lem thleng anga sawitu police-te chu hrem an phut bawk.