Tripura-ah pisa kai hun vawng dik lo sorkar hnathawk 39 insawifiah turin hriattir

Tripura-a Sepahijala district thuneitute chuan an huamchhunga sorkar hnathawk, pisa kai hun vawng dik lo mi 39 chu insawifiah tura hriattirna a pe. Heng zinga a tam zawk hian pisa an kai tlai ṭhin vang a ni.

Sepahijala district magistrate, Sidharth Shiv Jaiswal chuan hnathawk zinga hun vawng dik lote insawifiah tura an hriattir chhan chu pisa kai hun vawng dik tura an duh vang leh, mipui tana hna an thawhna kawnga discipline ṭha zawk a awm theih nana ti an nih thu a sawi. DM Jaiswal chuan,"Sorkar hnathawkte tan pisa kai hun ruat a ni a, sorkar chuan a hnuaia thawkte chu zawm turin a beisei a ni" a ti. Sorkar hnathawkte chu hun vawng dik tura chahin hemi hun chhung hian hna ṭha taka thawk turin a ngen.

DM Jaiswal chuan insawifiah tura hriattir chu District Magistrate Office, Sub-divisional Magistrate Office leh Block Development Office hnuaia thawkte an ni tih a sawi. Pisa kai hun chhinchiah nan biometric hman a nih thu leh, thawktu ṭhenkhat zingah pisa kai tlai an awm tih sawiin mi 39-te chu show-cause notice pek an ni a ti a, chhanna an pek dan a zirin hma lak chhunzawm a ni dawn tih a sawi. Mipuite tana hna ṭha taka thawh a ngaih thu leh, sorkar aṭanga hamṭhatna an dawn turte a hun tak leh rang taka an dawn theih nana bei turin thawktute chu a chah bawk.

Tripura sorkar hnuaia General Administration Department (GAD) chuan May 2023 khan thuchhuah siamin, sorkar hnathawkte pisa kai hun chu chawhma dar 10 aṭanga tlai dar 5:30 a nih tih a tarlang a, hei hi vawng dik turin hnathawkte chu an beisei a, thu chhuah zawm lote chu hrem an ni dawn tih a sawi a ni. Hemi bakah hian pisa kai hunchhung hian pisa chhuahsan lo turin hnathawkte chu a chah bawk. He hriattirna hian department hotute chu thupek kengkawh turin mawhphurhna a pe a ni.