MCI-in RIMS hnena pawmpuina pe lo turin Manipur University hriattir

Medical Council of India (MCI) chuan Regional Institute of Medical Sciences (RIMS), Imphal chu pawmpuina pe lo turin Manipur University (MU) a hriattir.

Kum 1972-a din RIMS hi hmarchhak state pasarih­a zirlaite tana siam a ni.

MCI chuan nikum September 5 leh 6 khan RIMS hi tlawhin academic facilities leh infrastructure an neihte a enfiah a, kumin January 15-a MCI meeting thu­chhuak chuan RIMS-a facilities leh infrastructure te chu a ṭhat tawk loh thu a tarlang.

MCI chuan RIMS-a facilities leh infrastructure ṭhat tawk loh avangin MBBS course-ah recognition pe lo turin Manipur University a hriattir a ni. RIMS hian academic facilities ṭha a nei thei a nih chuan MCI hian a thutlukna chu thla thum hnuah en­nawn an tum thu an tarlang bawk.

RIMS director Prof S. Sekharjit chu nikum August thlaa chawlhtir a nih vangin RIMS hian director nghet a la nei lo a, hei vang hian zirlaite an mangang tawh hle. Prof Sekharjit hi dental chair an leinaa sum ti­chingpena puhna CBI-in a chhuichian hnuah a hna aṭanga chawlhtir a ni.

Hetihlai hian RIMS hi hmar­chhak state ralmuang zawka sawn tuma a ruka hmalakna a tam hle niin MCI chuan a tarlang a, hei bakah hian RIMS inrelbawlna ṭha lo leh campus chhehvela dan leh thupek dinhmun awmze nei lo chu harsatna langsar zual a ni, a ti.