Congress-in Nagaland Guv chu a RSS mizia paih turin an duh

Nagaland Pradesh Congress Committee (NPCC) chuan central-a BJP sorkarin Governor atana ruat, Governor PB Acharya chu a hna zah­awmna tibawrhbang lo turin Hindu pawl, Rashtriya Swayamsevak Sangh (RSS) rilru paih tura an duh thu an tarlang.

Nagaland Congress party chuan PB Acharya chu Governor office tizah­awmloah puhin, Repub­lic Day lawmna, official programme atana thu­chhuah a siamah Gover­nor Acharya chuan “Bha­rat Mata” thlalak hmang­in, Bharat Mata thla chu BJP chhinchhiahna, lotus chungah a ding a, India map kentir a ni, an ti.

India rama sakhaw te zawkte'n BJP party pian­chhuahna, RSS te hnen aṭanga vauna nasa tak an tawh mek laiin, Governor-in hetiang thil a hmang hi BJP-RSS ṭangrualte thil tum tihpuitlin tumna a ni, tiin Nagaland Congress thuchhuak chuan a tarlang.

Congress chuan Nagaland chu kum 1963, December 1-a India ram state 16-na a nih aṭangin Governor te chu Hindu mi deuh vek an ni a, official programme-ah mahni sakhaw chhinchhiahna lan theihna tu mahin an tarlang ngai lo. India danpui hnuai­ah an mawhphurhna ṭha takin an hlen ṭhin a ni, a ti.

NPCC thuchhuak chuan Governor chu India danpui hnuaia mawhphurhna a neihte sakhaw thil tum bawhzuina atana hmang ṭangkai lo tura an phut thu an tarlang bawk.

Hetihlai hian Republic Day lawmna puala, Raj Bhavan-a inkhawm neihah Governor Acharya-a'n Hindi hmanga thu a sawi vangin Naga Hoho chuan an lawm loh thu an tarlang bawk.

Naga Hoho chuan thuchhuah siamin, zirna in leh hmun danga Hindi thehlar tumna chu an dodal loh thu an tarlang a, mahse Hindi ṭawng hmang lote punkhawmnaa Governor-in Hindi a hmang chu an hriatthiam loh thu an tarlang.

Naga Hoho chuan Governor-in programme sheet-a Bharat Mata thlalak a hmang chu an hriatthiam loh thu an tarlang bawk.