Assam-in Kazaringa-ah wildlife museum siam dawn

Assam Chief Minister Tarun Gogoi chuan state sorkarin Kaziranga-ah wildlife museum hawn a tum thu a sawi.

Gogoi chuan sa pel ru ṭhinte venna atana an hmalak dan turte ngaihtuahin kar kalta Ningani khan Kazaringa National Park (KNP) a tlawh a ni.

Assam Chief Minister chuan wildlife museum-ah chuan 3D show te neih a nih tur thu leh museum chuan khualzin tam zawk a hipluh ngei a rin thu a sawi.

Kazaringa National Park hi UNESCO chuan World Heritage Site-ah a lo puang tawh a ni.

Chief Minister Gogoi chuan kum tluan­a khualzin mite'n park an tlawh theih nan park enkawltute chu tourism lam tihchangtlun dan dap turin a hriattir bawk.

Gogoi-a fapa, Lok Sabha MP Gaurav Gogoi chuan Kaziranga tan hian tourism project changtlung tak siam a nih tur thu a sawi bawk a, project hian forest, tourism, cultural affairs department leh district administration te pawh a huam tel tur thu a sawi.

Chief Minister Gogoi chuan KNP-a samak te venhimna chu changtlung zawka kalpui a nih tur thu sawiin, mi 1200 telna special force din thuai an tum thu a sawi.

Sa pel ṭhinte ven nan technology changkang zawk hman a nih tur thu a sawi bawk a, KNP venghimna atana rawtna an siamte chu Union Minister of Environment, Forests and Climate Change Prakash Javadekar hnenah an thlen tawh thu a sawi bawk.