Nagaland special assembly session nei dawn

Nagaland-a rorellai Naga Peoples Front (NPF) party buaina vanga state sorkar buaina chuan thla khat a awh ṭep tawh a, Governor P.B. Acharya chuan tun kar hian harsatna chinfel nan assembly special session a koh rin a ni.

Sorkar official chuan he thu hi sawiin, Union Home Ministry thupek angin Governor Acharya chuan special session a koh a rin thu a sawi a, MLA 60 te chu kim vek tura beisei an nih thu leh sorkar fiahna neih a nih tur thu a sawi.

Nagaland cabinet meeting chuan January 15 khan assembly-a sorkar fiahna atan special session ko turin Governor an lo ngen tawh a ni.

Hetihlai hian NPF MLA lungawi lo pawlte chuan nimin khan Governor hi hmuh an tum a, special session ko lo turin Governor an nawr rin a ni.

Sorkar fiahna hi neih ni mah se Chief Minister Zeliang-a kaihhruai sorkar chuan thlawptu a nei tam tawk em tih hriat a ni lo.

Tuna a lan danah Chief Minister Zeliang-a hi assembly speaker tel loin MLA 25-in an thlawp. A thlawptute hi NPF MLA 16, NCP MLA pakhat, JDU MLA pakhat leh Independent MLA pasarih an ni.

NPF MLA lungawi lo pawl hruaitu, G Kaito Aye-a'n NPF MLA 21 leh Independent MLA pakhat thlawptu a nei thung.

Member 60 awmna Nagaland assembly-ah BJP chuan MLA pali a nei bawk a, an state BJP hotu, Paiwang Konyak-a'n party thuchhuah a siam zulzuiin MLA te'n vote an thlak ang.

Eptu party Congress-in MLA pariat a nei bawk a, khawi lamah nge an vote dawn tih hriat a la ni lo bawk.

DAN sorkar thupuangtu Yitachu chuan India danpui tlawhchhana harsatna chinfel mai loh chu kawng dang a awm loh thu sawiin, Governor thutluknaah a innghat a ti a, mipuite'n thildik an hriat hun a thleng tawh a ni, a ti.

Yitachu chuan Chief Minister chu vote hmangin assembly-ah chauh paihthlak theih a ni, a ti a, "NPF MLA lungawi lote'n assembly-a sorkar fiah an ngam loh chuan eng vangin thla khat dawn Naga mipuite an tihbuai?" a ti.

Hetihlai hian NCP MLA pathumin BJP an zawm avanga NCP-in Supreme Court-a petition an thehluh chu court-in a pawmsak.

Nikum June 16 khan NCP MLA pathum - T.M Lotha, Imtilemba Sangtam leh Mmhonlumo Kikon te chuan an party chhuahsanin, BJP an zawm a ni.

NCP MLA te'n BJP an zawm hnuah Assembly Speaker chuan MLA pathumte hi an nihna a hlihsak a, mahse MLA pathumte hi Gauhati High Court-ah zualko nghalin, Kohima Bench chuan speaker thutlukna hi hnawl a, MLA pathumte hi thiam a chantir a ni.

Hemi vang hian Central-a NCP party thuneitu sangte chuan MLA pathumte lakah hian thubuai an siamsak a ni.

MLA pathumte hian India danpuia, Tenth Scheduled tlawhchhanin party danga inchhunluh chu thil theih a ni, an ti. Supreme Court chuan hemi chungchangah hian February 10-ah hearing a ko nghal.